Hezkuntza Bereziko langileen %70 ordezkatzen dute LAB, Steilas eta CCOO sindikatuek, eta haiek sinatu dute Eusko Jaurlaritzako Hezkuntza Sailarekin egindako akordioa. Gaur bilera egin dute Gasteizen, eta amaieran akordioa sinatu dute hiru sindikatu horietako kideek.
Asteko lan orduak zehaztu dituzte, eta 260 lanpostutarako Lan Eskaintza Publikoa egitea adostu dute, besteak beste. Jaurlaritzaren arabera, indarrean sartuko da Aldizkari Ofizialean akordioa argitaratu orduko.
LABek nabarmendu du "hobekuntza nabarmenak" dakartzala akordioak langileentzat, eta zerbitzua ere asko hobetuko dela.
ELAk, ordea, ez du bat egin akordioarekin, uste baitu hark ez duela konponduko sektorearen "egoera larria". Gainera, beste sindikatuak kritikatu ditu akordioa sinatzeagatik: "Martxoko grebaren aurretik egin zuten proposamen berbera da".
