Mendia

Mari Abrego alpinista nafarra hil da

K2n 8.611 metroan pioleta jarri zuen lehen euskal mendizalea izan zen, Josema Casimirorekin batera.

Abrego, K2ko tontorrean. /
Abrego, K2ko tontorrean. / Joema Casimiro

Arantxa Elizegi Egilegor -

2018ko apirilak 19

Gaixotasun luze baten ondoren hil da Mari Abrego mendizale nafarra. 1944ko uztailaren 4an jaio zen; 40 urte zituela, 1984an egin zuen lehen zortzimilakoa, Makalu —munduko mendi garaienen artean bosgarrena—, Himalaian. Urte berean egin zuen Kangchutse mendia ere. Ez ziren horiek izan Abregok igo zituen lehenak, hala ere; aurrez eginak zituen Huamasraju (5.328 metrokoa), Hindu Kush (7.690 metro) eta Dhaulagiri (7.400).

Hurrengo urteetan ere zaletasunari eutsi zion, eta, 1986an, K2ra igo zen lehen euskal mendizalea izan zen, Josema Casimirorekin batera. Hiru urte lehenago ere ahalegindua zen mendizale nafarra gailurra egiten, baina Roger Baxter britainiarrarekin egindako bidaia hartan ez zuen goraino igotzea lortu. 1986ko ekainaren 23 hartan, ordea, tontorreraino heldu ziren bi mendizaleak. "50 minutu egin genituen tontorrean. Hain ginen gustura mendigune amaigabea gure azpian ikusita", kontatu zuen gerora Abregok berak.

Gerora helduko ziren gailur gehiago ere, Nanga Parbat, Broard Peak eta Cho Oyu, besteak beste. Ahalegindu zen behin baino gehiagotan Everestera igotzen ere, baina ezin izan zen gailurreraino heldu. Urte luzez mendi gidaria izan zen bai Andeetan eta baita Himalaian ere. Nafarroako Gobernuak ematen duen Kirol Merezimenduaren urrezko domina ere jaso zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna