AVT: "ETAren itxurakeria bat ikusi dugu, beste behin"

Biktimen elkarteak dio ETAk "biktimak umiliatzen" jarraitzen duela gaurko adierazpenarekin. Coviteren ustez, berriz, "bere existentzia justifikatu nahian" ari da ETA.

AVTren ekitaldi bat. Irudian, Angeles Pedraza elkarteko ohorezko presidentea
AVTren ekitaldi bat. Irudian, Angeles Pedraza elkarteko ohorezko presidentea Juanjo Martin / EFE

Jon Ander De la Hoz -

2018ko maiatzak 3

ETAren jakinarazpena "itxurakeria" dela adierazi du AVT Terrorismoaren Biktimen Elkarteak. Kaleratutako oharrean, AVTk azpimarratu du "biktimak umiliatzen" jarraitzen duela ETAk, eta gaitzetsi egin du agiria Josu Urrutikoetxeak irakurri izana: "Justiziarekin dituen zorrak tarteko, espetxean egon beharko luke".

Halaber, AVTk dio ETAk "faszikuluka" eman duela bere amaieraren berri: "Ez da justiziarekin elkarlanean aritu, ez ditu armak entregatu, eta barkamena ez die biktima guztiei eskatu". Horrez gain, biktimen elkarteak adierazi du "eragindako mina onartzeke" dagoela.

AVTk dei egin dio Espainiako Gobernuari "ETAren propaganda kanpainarekin" amaitu dezan: "Nazioartean onak direla saldu eta Espainia eta Frantzia haien aldarrikapenetara  behartu nahi ditu".

Covitek, berriz, ETAren amaiera "ez duina" izan dela dio: "Uko egin dio bere erantzukizuna hartzeari". Covitek "bere existentzia justifikatu nahian" aritzea leporatu dio ETAri, eta dio "absoluzio historikoaren bila" ari dela. "Kolektibo gisa, errelatoaren batailan engaiatu behar dugu orain, biktimen egian oinarrituta", adierazi du elkarteko bozeramaile batek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna