Katalunia

Puigdemontek Quim Torra proposatu du presidente izateko

Hautagaiak nahiko babes izango duela aurreikusten da. Torrentek bihar egingo du bilera erronda, eta aurki deituko du inbestidura saioa.

Josep Rull eta Quim Torra (eskuinean), legebiltzarrean.
Josep Rull eta Quim Torra (eskuinean), legebiltzarrean. Andreu Dalmau/Efe

Berria -

2018ko maiatzak 10

Quim Torra izango da presidentetzarako hautagaia. Hala jakinarazi die gaur arratsaldean Carles Puigdemontek Marta Pascal PDeCATeko koordinatzaileari, JxCeko bozeramaile Eduard Pujoli eta Roger Torrent Legebiltzarreko presidenteari, besteen artean. Gero, Alemaniatik internetez zabaldu duen mezuan jakinarazi du JxC talde parlamentario osoaren proposamena dela, eta "behin-behineko presidente" izateko proposamena dela. Eskubide urraketa salatu du, eta elkarrizketarako deia egin du berriz ere. Egoera desblokeatzeko, arduraz jokatzeko deia egin du. Txio bat ere idatzi du, Torrari eskerrak emanez:

Maiatzaren 22rako presidentea aukeratzen ez badute hauteskundeak egitera behartuta daude Katalunian. Saiatu dira Carles Puigdemontekin, saiatu dira Jordi Sanchezekin eta saiatu dira Jordi Turullekin ere, baina Espainiak ez die ametorik eman haiei. Auzipetuta daude hirurak process deituagatik, aurrena Alemanian dago, erbestean, eta beste biak preso. Hautagai garbi bat behar zuten, eta gaur iragarri du Puigdemontek berea: Quim Torra. JxCko diputatua, abokatua, idazlea eta editorea. Omnium Culturaleko presidente ere izan zen Muriel Casals ustekabean hil zenetik Jordi Cuixart aukeratu zuten arte. Puigdemonten konfiantzazkoa da, eta haren zilegitasuna defendatu izan du behin eta berriz. Hainbat iturriren arabera, gainera, ez da gaizki moldatzen CUPeko kideekin.

Torrak ERCren babesa izango duela aurreikusten da, eta beraz, ez luke arazorik izan behar hura aukeratua ateratzeko. Torrentek bilera erronda abiatuko du bihar, telefonoz, eta horren ostean egingo dute inbestidura ekitaldia. CUP abstentzioaren alde agertu izan da, baina igandean egingo dute azken erabakia hartzeko batzarra. ERCk bere babesa eta konfiantza dituela jakinarazi dio Torrari, txio batean.

Eta baita Oriol Junquerasek ere.

Atzo indargabetu zuen Puigdemont telematikoki inbestitzeko aukera Espainiako Auzitegi Konstituzionalak. Horretarako aukera ematen zuen Presidentetza Legearen erreforma bat onartu zuen Kataluniako Legebiltzarrak, baina Espainiako Gobernuak hari jarritako helegitea tramiterako onartuta, automatikoki indargabetuta geratu da moldaketa, eta, hortaz, erbestean dagoen presidente hautatua inbestitzeko aukera. Konstituzionalak aho batezko erabaki du tramiterako onartzearena, baina neurria behin-behinekoa da. Konstituzionalak bost hilabeteko epea dauka orain lege moldaketa guztiz indargabetzen duen ala helegitea baztertzen duen erabakitzeko. Nolanahi ere, azkenean erreforma ontzat emango balu ere, beranduegi da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna