Milaka euskaltzale elkartu da, gaur, Herri Urrats Ipar Euskal Herriko ikastolen aldeko festan, prefosta lelopean. Bertaratu direnek ikastolei babesa agertu diete eta jaigiroaz gozatu dute. Aurtengo festan bildutako dirua Larzabalgo Manex Erdozaintzi ikastolara (Nafarroa Beherea) bideratuko da.
Jaia eta aldarria uztartu ohi ditu Herri Urratsek eta Seaskak izan du eskerik euskarazko hezkuntzaren alde, aurten ere. Ikastolek azken urteetan izan duten ikasle kopuruaren gorakadaren ondorioz, 25 irakasle plaza gehiago eskatu dizkio Frantziako Hezkuntza ministerioari. Hark, ordea, ukatu egin dio eskatutakoa eta lau plaza gehiago besterik ez dizkio onartu. Joan den larunbatean, manifestazioa egin zuten Baionan, ikastolentzako irakasle gehiago galdegiteko.
Gobernuaren erabakia baieztatu du, gaur, Senperen, Pierre Barriere Frantziako Akademiako ikuskariak eta nabarmendu du badirela beste erronka batzuk. Horien artean, irakasleen formakuntza.
Paxkal Indo Seaskako lehendakariak azaldu du lau postuak urrun direla beren beharrak asetzetik: "25 postu behar ditugu, ez daitezen 40tik gora ikasle izan geletan, eta elbarritasun bat duten haurrek baldintza duinetan ikas dezaten".
Gaurko ekitaldian, babesa eskatu die Indok Ipar Euskal Herriko hautetsiei. Iragarri duenez, Seaskak mozio bat helaraziko die "ondoko egunetan" herriko etxeetan eztabaidatu eta onartu dezaten.
Jean Rene Etxegarai Euskal Elkargoko lehendakariak kezka agertu du Frantziako Akademiaren jarrerarekin, eta euskararen etorkizuna jokoan dela ohartarazi du.
Hona gaurko egitaraua:
Aurtengo abestia 2zio rap taldeak egin du eta Manex Erdozaintzi ikastolan grabatu dute bideoklipa.
[youtube]https://youtu.be/1lH9-KG7wvw[/youtube]
