Gizartea

Plastikozko poltsa arinak ere ordaindu egin beharko dira uztailetik aurrera Hegoaldean

Orain artean dendetan doan ematen ziren poltsei eragingo die dekretuz hartutako erabaki horrek. Hamabost mikra baino txikiagoko poltsak bakarrik daude neurritik salbuetsita.

Plastikozko poltsa handiak rdaindu egiten dira dagoeneko; txikiei eragingo die neurriak
Plastikozko poltsa handiak rdaindu egiten dira dagoeneko; txikiei eragingo die neurriak Iñigo Uriz / Foku

Jon Ander De la Hoz -

2018ko maiatzak 18

Erosketak egiteko orduan erabilitako plastikozko poltsa guztiak ordaindu egin beharko dira Hego Euskal Herrian. Poltsa arinek "izugarri kutsatzen dutelako" hartu du erabakia Espainiako Gobernuak; bereziki, orain artean doan ematen zituzten poltsa txikiei eragingo die neurriak. Gobernuaren esanetan, poltsa horiek berrerabilpen tasa baxua dute, eta oso erraz barreiatzen dira lurrean, duten pisu txikiarengatik. Neurria uztailaren 1ean sartuko da indarrean.

Alabaina, hamabost mikratik beherako poltsak neurritik salbuetsi dituzte; higiene kontuak argudiatu dituzte horretarako. Isabel Garcia Tejerina ministroaren arabera, neurri horrekin plastikozko poltsen erabilera murriztu eta Frantzia eta Italiaren mailan kokatuko da Espainia. 1950eko hamarkadan hasi zen plastikoaren ekoizpen industriala, eta, ordutik, etengabe hazi da haren erabilera.

Puri-purian dagoen gaia da plastikoarena. Erabilera bakarreko plastikoen aurkako Break Free From Plastic mugimendua (Plastikoarekin hautsi) abiatu zuten duela hilabete batzuk. Mundu osoko 1.100 elkarte batu dira plastikoaren kontrako mugimendura; Euskal Herrian Greenpeace elkartea ari da kanpaina horretan, batik bat. Apirilean protestak egin zituen Greenpeacek Bilbo, Donostia, Gasteiz eta Iruñeko supermerkatu batzuen atarietan.

Plastikoaren arriskuez ohartarazi zuen iaz BERRIAn Nicolas Olea erradiologiako katedradunak: "Ikusi dugu umeen %100ek Bisfenol A dutela gernuan. Umeek plastikoa dute gernuan! Eta erantzun digute: «Lasai, Alemaniako umeek beste da». Beraz, Europako umeen batez bestekotik gora ez gaudenez, lasai egon behar dugu. Baina normala al da Europako umeek pixetan plastikoa botatzea?".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna