Epaiketa

Iruñeko istiluko gazteak babestu dituzte, epaiketaren atarian

Astelehenean eta asteazkenean epaituko dituzte, Espainiako Auzitegi Nazionalean, "desordena publiko terroristak" leporatuta. Zazpina urte espetxe zigorra galdegin du fiskaltzak haietako bakoitzarentzat.

Errenterian eginiko elkarretaratzea; lehen lrroan, auzipetuen gurasoak
Errenterian eginiko elkarretaratzea; lehen lrroan, auzipetuen gurasoak / Jon Urbe (Foku)

Berria -

2018ko maiatzak 18

Elkarretaratze jendetsua egin dute Errenteriako udaletxeko plazan (Gipuzkoa), hango hiru gazteren eta Beasaingo (Gipuzkoa) beste baten aurka astelehenean hasiko den epaiketa salatzeko.

Hangoak dira Asier Petrirena, Ruben Iglesias eta Endika Etura. Istiluen egunean atxilotu zituzten, eta zortzi hilabete egin dituzte preso, Iruñeko espetxean. Baldintzapean aske daude iazko azarotik. Beasaingoa (Gipuzkoa) da Julen Prado. Denera hogei bat lagunek deklaratu dute instrukzio fasean.

Espainiako Auzitegi Nazionaleko 2. Sekzioak epaituko ditu. Fiskalak "desordena publiko terroristak" leporatzen dizkie: zazpina urteko espetxe zigorrak galdegin ditu, eta hamahiruna urterako inhabilitazioak eta 45.000 euroko isuna.

Kale istiluak terrorismoarekin lotzeko, Zigor Kodeko 573. artikuluan oinarritu da fiskala. "Bake publikoa larriki aztoratzea" leporatu die. Ezker abertzalearen ildo ofizialetik kanpo kokatu ditu Errepresioari Autodefentsa dinamika eta auzipetuak. Sektore horrek "kale borroka" babesten duela dio.

Iazko martxoaren 11n, Errepresioari Autodefentsa dinamikak manifestazio batera deitu zuen Nafarroako hiriburuan, "herri eragileen aurkako eraso errepresiboak" salatzeko. Alde Zaharrean, istiluak izan ziren han zeuden gazte batzuen eta polizien artean. Lau pertsona atxilotu zituzten. Iruñeko 4. Instrukzio Epaitegiko epaileak haietako hiru espetxeratu zituen, eta "terrorismo" delituak leporatuta, Espainiako Auzitegi Nazionalaren esku utzi zuen auziaren instrukzioa, Nafarroako Probintzia Auzitegiaren iritziaren kontra. Carmen Lamela epaileak hartu zuen kasua —Altsasuko auziko instrukzio epaile berak—.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna