Senatuak joan den astean haren izendapenaren alde bozkatu ondoren, Gina Haspelek gaur hartu du CIA Inteligentzia Agentzia Zentralaren ardura. Hala, Donald Trump presidenteak bururatu du Rex Tillerson Estatu idazkaritzatik kenduta egindako gobernu aldaketa, Mike Pompeo CIAko buruzagitzatik diplomaziaren buruzagitzara igarota, eta Haspel, berriz, zerbitzu sekretuen arduradun eginda. Karguaren zina egiteko hitzaldian Haspelek "emakumezko heroiak" izan ditu gogoan.
Haspelek 61 urte ditu, eta 2001eko irailaren 11ko atentatuen ondoren, CIAk Thailandian zuen espetxe klandestino baten arduraduna izan zen. Abu Zubaidah eta Abd al-Rahim al-Naxiri Saudi Arabiako herritarrek salatu zuten espetxe horretan torturatu zituztela —Al-Qaedako kide izatea leporatuta atxilotu zituzten, eta Guantanamoko espetxean dauzkate preso gaur egun—.
Joan den asteko agerraldian senatari batzuek aro hartaz eta torturaren erabileraz galdetu zioten Haspeli. Iraganaz ez zuen ezer esan nahi izan, eta adierazi zuen ez litzatekeela izan beharko CIAren ardura "galdeketak egitea".