Duela hamahiru urte ere Santurtzin egin zuten Ibilaldia, Bihotz Gaztea ikastolaren alde. Aurten bigarrengoz egokitu zaie jaialdia antolatzea, izan ere ordutik hona bikoiztu egin da ikasle kopurua eta eraikina txiki geratu zaie.
Ilusioz hartu due ikastolen aldeko jaia antolatzeko lana guraso, ikasle eta irakasleek. "Urte osoa daramagu gelditu gabe lanean", aitortu dio BERRIAri Andone Mendizabal zuzendariak. Bildutako dirua zertarako erabiliko duten ere argi dute dagoeneko. Ikastolak badu handitze proiektu bat eta hura gauzatzea da helburua: "Daukagun ahalmenaren arabera joango gara egiten".
Goizeko 9:30ak pasatxo zirenean eman diote hasiera jaialdiari. Eguraldia lagun, giro onean egin dute Ibilaldia, eta ohiko moduan garraio publikoa erabiltzeko aholkatu diete bertara hurbiltzen direnei.
Abiatu dugu @Ibilaldia Bagoaz Santurtziko kaleak betetzera! pic.twitter.com/GO6IfPznwJ
— Ikastolen Elkartea (@EHIkastolak) 2018(e)ko maiatzaren 27(a)
Egitarau oparoa prestatu dute antolatzaileek egun osorako. Besteak beste, herri kirolak, Governors eta Trikizio taldeen kontzertuak, harrizulatzaileek erakustaldia eta pailazoak.
