Erreskatea

Zazpi euskal herritar erreskatatu dituzte Huescan, Fagoko arroilan

 

Berria -

2018ko maiatzak 28

Irun, Oiartzun, Pasaia eta Hondarribiko (Gipuzkoa) bost lagun eta Tuterako (Nafarroa) beste bi erreskatatu dituzte Fagoko arroilan (Huesca, Espainia), joan den asteburuan, beste lau mendizalerekin batera.

Arroila jaistea lortu zuen mendizale batek Guardia Zibilari abisu eman zion larunbatean, 16:30ak aldera, ur mailak nabarmen gora egin zuela eta bere atzetik zihoazen mendizale batzuek zailtasunak zituztela bidean aurrera egiteko.

Guardia Zibilak helikopteroz baieztatu zuen arroilak ur emari handia zuela, eta airetik hiru mendizale ikusi zituen barrunbe batean harrapatuta. Erreskate zerbitzuek barrunbera iristea lortu zuten, helikopteroaren 55 metroko sokari barrunbean zegoen mendi gidariaren soka lotuta. Barrunbearen barruan beste zortzi mendizale zeuden. Onik aurkitu zituzten denak, hipotermia zantzu arinak izan arren. Erreskate zerbitzuek janaria, edari beroa eta manta termikoak eman zizkieten.

Ur mailak hazten jarraitzen zuenez, ezinezkoa izan zen une horretan erreskatearekin jarraitzea, eta mendizaleak koba baten barruan gorde ziren. Larunbat gaua kobaren barruan eman zuten mendizaleek, ur emaria noiz murriztuko zain. Igande goizean, ur maila apalagoarekin, 10:00ak aldera ekin dio Guardia Zibilak berriz ere erreskateari, eta helikopteroaren garabiaren bidez atera ditu 11 mendizaleak arroiletik.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna