Toni Cominek ez du boto delegatua baliatuko Kataluniako Parlamentuaren bozketetan. Bruselan erbestean den Osasun kontseilariak uko egin dio azken saioetan bozkatzeko izan duen aukerari. Orain arte, Sergi Sabria ERCko alderdikideak bozkatu du haren ordez. Erabakiaren berri eman dio, gaur, parlamentuko mahaiari, eskutitz baten bidez. Mahaiak gaur bertan jorratuko du gaia.
Parlamentuko mahaiak Cominen boto delegatuari buruzko erabakia hartzea eragotziko du kontseilariak gaur hartu duen erabakiarekin. Izan ere, PSCk eta Ciutadansek botoa delegatzeko baimena berriz aztertzeko eskatu zion mahaiari, Belgikako Justiziak Cominen gaineko euroagindua baztertzeko erabakia hartu zuenean. Ebazpen hark mugimendu askatasuna aitortu zion kontseilariari.
Cominek boto delegatuari borondate propioz uko egin dionez, mahaia ez da behartuta egongo PSCren eta Ciutadansen galdeari erantzutera, eta Cominek diputatu aktari eutsiko dio.
Cominen erabakiak, baina, eragin zuzena du parlamentuan osa daitezkeen gehiengoetan. Orain arte, JxCk eta ERCk gehiengo soila zuten, bozketan CUP abstenituz gero; baina Cominen botorik gabe bi indar independentista nagusiek CUPen babesa beharko dute haien proposamenek aurrera egin dezaten.