"Egoera erabat kontrolpean hartu arte jarraituko du gerra honek", esan dio AFP agentziari Asaduzzaman Khan Bangladeshko Barne ministroak. Bi aste baino gutxiagoko epean Poliziak 102 lagun hil ditu droga trafikatzaileen aurkako operazioetan. "Hildako gehienek armak zituzten. Polizia ikusi bezain azkar hasten ziren tiroka", justifikatu du Khanek. AFP agentziak Poliziako iturriak aipatuta dioenez, azken hamar lagunak gaur goizean bertan hil dituzte, "batzuk Poliziaren aurkako tiroketetan, beste batzuk trafikatzaile taldeen artekoetan".
Giza Eskubideen Batzorde Nazionalak "kezka larria" agertu du hildako kopuru handiarengatik, eta uste du Poliziak exekuzioak egin dituela.
