Zentsura mozioa

ERCk eta PDeCatek zentsura mozioa babestuko dute "Rajoyren aldia" amaitzeko

ERCk nabarmendu du Sanchezi emango dioten baiezkoa Rajoyrentzako ezezkoa dela. PDeCatek adierazi du bere zortzi diputatuek Sanchez presidente izendatzearen alde bozkatuko dutela, "desadostasunetik".

Joan Tarda ERCren Kongresuko bozeramailea, gaur, PSOEren zentsura mozioaren eztabaidan. /
Joan Tarda ERCren Kongresuko bozeramailea, gaur, PSOEren zentsura mozioaren eztabaidan. / Zipi/EFE

Berria -

2018ko maiatzak 31

Joan Tarda ERCko bozeramaileak gogora ekarri du 1994an PPko Jose Maria Aznarrek ustelkeria kasuengatik eskatu ziola PSOEko Felipe Gonzalezi gobernua uzteko. 24 urte ondoren, Rajoy ustelkeria kontuengatik gobernutik kentzeak forgatzen du, Tardaren esanetan, ustelkeria "78ko erregimen monarkikoan errotuta" dagoela.

Ustelkeriaren hedatzea agintari politikoen zigorgabetasunarekin lotu du Tardak, eta zigorgabetasunarekin lotu du Espainiak Kataluniako auzian izan duen jarrera. "Zuek ez duzue negoziatu. Zuek harrokeriaren bunkerrean, gehiengoak gutxiengoari eginiko abusuan".

Tardak Sanchezi elkarrizketa eskatu dio, eta erabakitzera deitu du "estatu politikaria" izan nahi duen ala auziari erreparatu gabe gobernatu nahi duen.

Sanchezek Tardari erantzun dio Kataluniako auziari irtenbidea emateko "blokeen dinamika" gainditu behar dela. Horretarako, "kataluniarrek onartu zuten estatutua" eta "espainiarrek onartu zuten konstituzioa" ezarri ditu elkarrizketarako esparru. Sanchezen esanetan, bi oinarri horietan bilatu beharko lirateke "Espainia den proiektu komunean elkarbizitzeko eta elkarrizketarako adostasun puntuak".

Carles Campuzano PDeCateko diputatuak jakinarazi du bere alderdiak PSOEk aurkeztutako zentsura mozioa babestuko duela. Campuzanok Sanchezi eskatu dio "giro politikoa eta soziala" aztertu ditzala. PDeCateko bozeramaileak ohartarazi du ezin dela "Kataluniaren kontra" bozkatu, hala egiten duenak konfiantza galtzen duelako.

Campuzanok Sanchezi galdegin dio gauzak "erraz" ez jartzeko "tentsio politikoan bakarrik bizitzen dakitenei", Ciudadanosi erreferentzia eginez.

Sanchezek "elkarrizketa eta akordioa" eskaini dizkio PDeCati Kataluniako auziari "konponbide politikoa" emateko. Sanchezek Kataluniarrek adostu zuten autonomia estatutuaren indargabetzean kokatu du Kataluniako gatazkaren jatorria. Haren esanetan, beharrezkoa da estatuko zenbait lurralderen "identitatea" eta "nazio sentimendua" Espainiaren lurralde batasunarekin uztartzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna