Sanchezek 180 boto jaso ditu Rajoy botatzeko

Sanchez izendatu aurretik ere bazeuden ministro nortzuk izendatu daitezken iragarri nahi zuten kinielak, baina gaurko bozketaren ondoren areagotu egin dira. Zenbaitzuek Patxi Lopez aipatzen dute horien artean.

"Bai, ahal da" oihuekin agurtu du Unidos Podemosek Rajoy, Kongresuak Sanchez presidente izendatu duenean.

Nagua Alba Ahal Dugu-ko diputatuaren esanetan, "aldi berri bat" hasiko da orain, "zaila baina itxaropentsua". Ahal Dugu-ren esanetan, gaurkoa "pozik" egoteko eguna da.

EH Bildu agur esan dio Rajoyri, Euskal Herriaren eraikuntzan "oztopoa" izan delako

EH Bilduk begi onez hartu du Kongresuak Rajoy gobernutik kanporatu izana. Euskal Herriaren eraikuntzarako traba izan dela nabarmendu du.

Mendiak "Euskadirentzako garai berri bat" iragarri du, Sanchezen agintaldiarekin

Idoia Mendia PSE-EEko idazkari nagusiak babesa agertu dio Sanchezi, eta ziurtatu du Espainiako presidente berriak "erronka izugarri honi" erantzuten jakingo duela. "Eskerrik asko, Sanchez jauna, duintasuna itzultzeagatik. Ziur nago, gobernuko presidente bezala, erronka izugarri honi erantzuten jakingo duzula. PSOEren garaia da, akordioarena eta eskubideen hedatzearena, Espainiarentzako eta Euskadirentzako aldi berri bat".

Gracias @sanchezcastejon, por devolvernos la dignidad. Estoy segura de que, como Presidente del Gobierno, sabrás responder a este enorme reto. Es el momento del @PSOE, del acuerdo y la extensión derechos, un tiempo nuevo para España y para Euskadi. #GobiernoDeLaDignidad pic.twitter.com/tqwmfJvhAM

— Idoia Mendia (@IdoiaMendia) 1 de junio de 2018

Carles Puigdemont Kataluniako presidente ohiak Sanchezen izendapenari buruzko adierazpena egin du bere Twitter kontuan. "Mendekuaren aldekoak izango bagina, gaur asebeteta egongo ginateke. Baina, justiziaren aldekoak garenez, gaur oraindik ezin dugu ezer ere ospatu. Borroka eta bide luze bat ditugu aurretik bidegabekeriak gainditzeko; asko gara, eta ekinak".

Si nosaltres fóssim de venjança, avui ja ens podríem donar per satisfets. Però com que som de justícia, avui encara no podem celebrar res. Ens queda una llarga lluita i un llarg camí per vèncer les injustícies, que són moltes i persistents.

— Carles Puigdemont 🎗 (@KRLS) June 1, 2018

Compromiseko Joan Baldovik nabarmendu du Sanchezen gobernua "zilegia" dela. Legealdi hasieran bere alderdiak esan bezala, Rajoy gobernutik kentzea posible zela frogatu da, haren esanetan. Compromis kide "leiala" izango dela aurreratu du. Balodoviren arabera, "itxaropenez betetako aldia" hasiko dela ziurtatu du, eta gaineratu du Sanchezek hitzartutakoa betetzen badu Compromisek "erraz" jarriko diola agintaldia.

Urkulluk urratsak eskatu dizkio Sanchezi autogobernuan

Iñigo Urkullu Eusko Jaurlaritzako lehendakariak "katarsi politikoa" sustatzeko galdegin dio Pedro Sanchez Espainiako presidente izendatu berriari. Sanchezi Gernikako Estatutua betetzea eta autogobernuan aurrerapausoak egitea eskatu dio. Lehendakariak "etengabeko elkarrizketa" eta "akordiorako borondatea" eskaini dizkio.

Bestalde, EAJk zentsura mozioa babesteko hartu duen erabakia defendatu du Urkulluk. Adierazi duenez, ez du espero PPk EAJrekiko "mendekua" bilatzea.

Riveraren esanetan, "gobernu ahul" bat eratuko du Sanchezek, eta "ezegonkortasun aldi bat" hasiko du, hauteskundeetara deitzen duen arte. Hauteskundeetara lehenbailehen deitzea galdegin du.

Albert Riverak hedabideen aurrean esan du Rajoyren gobernuari amaiera eman nahi ziola Ciudadanosek, "baina ez era honetan". Adierazi duenez, gizarteak "oso erne" egon beharko du Sanchezek independentistei trukean zer ematen dien jakiteko. Sanchezen gobernuarentzako alternatiba prestatuko dutela aurreratu du.

Iglesiasentzat izan da Sanchzen lehen agurra. Bere taldeko diputatuak banan-banan agurtzen ari da orain.

Sanchezek eta Iglesiasek elkar agurtu dute.

Pedro Sanchez, irribarretsu, ganberaren txaloak eskertzen ari da.

Txalo zaparrada Kongresuan. Unidos Podemoseko diputatuak "bai, ahal da" oihuka.

Emaitzaren ondorioz, Pedro Sanchez (PSOE) presidente berria dela adierazi du Ana Pastor Kongresuko presidenteak.

350 diputatuek bozkatu dute. 180k alde; 169k ontra, eta abstentzio bat.

Berehala emango dute bozketaren emaitza. Ez da sorpresarik izan.

Mahaiko presidente Pastorrek ezetz bozkatu du.

Mahaiko kideen botoekin amaituko da bozketa.

Mariano Rajoyk ezetz bozkatu du. Haren atzetik ezetz bozkatzen ari dira Espainiako Gobernuko gainontzeko kideak.

Rafael Merino Lopez PPko diputatuak "no es no" [ez ezetz da] bozkatu du, Sanchezek Rajoyren inbestiduran izan zuen jarrera gogora ekarriz.

Oskar Matute EH Bilduko diputatuak ere euskaraz eman du baiezkoa.

Mikel Legardak (EAJ) "bai" bozkatu du, euskaraz.

Patxi Lopezek (PSOE) bere alderdiaren zentsura mozioaren alde bozkatu du.

Pablo Iglesias Unidos Podemos taldeko bozeramaileak ere zentsura mozioaren alde bozkatu du.

Aitor Esteban EAJko talde parlamentarioko bozeramaileak baiezkoa eman dio PSOEren zentsura mozioari.

Marian Beitialarrangoitia EH Bilduko diputatuak "bai" bozkatu du, euskaraz.

PPko Eloy Suarez Lamata diputatua erratu egin da, eta Sanchezen alde bozkatu du. Berehala zuzendu du boza.

Rufianek eta Tardak (ERC) baiezkoa bozkatu dute. Hala egin du EAJko Sagastizabalek ere.

Hasi da zentsura mozioaren bozketa. Haren alde bozkatzen ari dira ERC, PDeCat, EAJ eta Unidos Podemoseko diputatuak.

Mariano Rajoy ere sartu da ganberara. Agurtzera joan zaizkio PPko diputatuak, eta argazkilariek ere inguratu egin dute. Pedro Sanchezek lehen PPko bozeramaileari esan dio inork ez duela eurekin bidea egin nahi.

Bozketa hastear da. Kongresuko mahaiak bozkatzera deitu ditu diputatuak. Euren izenak esango dituzte, eta botoa esan egin beharko dute.

Alderdi Popularreko zuzendaritza bilerara deitu du astearterako Rajoyk, zentsura mozioaren osteko egoeraz hitz egiteko.

Atsedena egingo dute orain, eta 11:00etan izango da bozketa.

Rajoy: "Ohore bat izan da Espainiako gobernuburu izatea"

Barkamena eskatu du Rajoyk inor iraindua sentitu bada, eta eskerrak eman dizkie alderdikideei: "Zorte on guztiei Espainiaren mesedetan". Alderdikideek berriz ere txaloz agurtu dute.

Oraintxe sartu da Rajoy parlamentuan.

Sanchez: "Katalunia Espainian egotea nahi du gobernu honek, eta, horretarako, hura entzuteko prest dago".

Hernandok gogorarazi du Sanchez ez dela diputatu, eta ohartarazi horrek erakusten duela hastear den garai honetan "denak" balio duela: "Akordio ilunak egin dituzue bulegoetan, eta ez dituzu horiei buruzko xehetasunak eman nahi. Ez espero nire talde parlamentarioak bidaia honetan lagunduko dizunik".

PPren aurrekontuen aurkako kritikak egin ostean, horiek EAJren babesa lortzeko mantentzea egotzi dio beste behin Hernandok Sanchezi. "Bilduren botoekin zatoz hona. ETAren lagun zaharrekin".

Europari emandako hitza, aurrekontuak bete eta 2019rako aurrekontuak onartu. Horiek sozialisten lehentasunak; hauteskundeak aipatu ere ez.

Leialtasuna eskatu dio Sanchezek Alderdi Popularrari, eta gogorarazi du PSOEk ere "terroristen erasoak" jasan dituztela.

Sanchezen erantzuna, orain. Eztabaida gutxienez 11:00ak arte egingo dute, eta, ondoren, bozketa.

Zentsura mozioa erretiratzeko eskatuz amaitu du hitzartzea Hernandok, eta ohartarazi du Jose Luis Rodriguez Zapaterok "krisi sakonean murgilduta" utzi zuela estatua: "Zuk zuzendu nahi duzun Frankenstein gobernua mehatxua da espainiarrentzat".

Zutik eta txaloka agurtu dute alderdikideek Hernando.

Jeltzaleei Hernandok: "Uste genuen zuengan konfiantza izan genezakeela. Oker geunden".

Bitartean, parlamentuko korridoreetan Juan Igancio Zoido Barne ministroa kargutik kanpo balego bezala hitz egiten.

Katalunian subiranisten gobernua ahalbidetzea leporatu dio Hernandok Ciudadanosi. Badirudi Alderdi Popularra hasi dela bozetarako kanpaina egiten.

Ara egunkariak euskaraz agurtu du Mariano Rajoy.

Hernando: "Ibarretxeren garaietara itzuli nahi duzue, eta norabide okerra da hori"

"ETAkoen lagunekin" gobernatzea egotzi dio Hernandok Sanchezi: "Merezi du honek guztiak zure nahi pertsonalak bete ahal izateko. Prest zaude denon artean eraiki dugun Espainiaren proiektu hau suntsitu nahi duten muturrekoekin elkartzeko?".

PDeCATeko buru Marta Pascalek zehaztasunak eskatu dizkio Sanchezi atzo egindako elkarrizketa eskaintzari buruz, eta Quim Torra Generalitateko presidentearekin "lehenbailehen" biltzeko galdegin dio.

Moncloara "atzeko atetik" sartzea leporatu dio Hernandok Sanchezi, eta baita azken bi hauteskundeetako emaitzak onartu ez izana ere: "Iruzurra egitera zoazte".

Hernando (PP): "Oinarririk gabeko zentsura mozioa aurkeztu dute betikoek"

Bere hitza urratu eta kritikatutako aurrekontuak beteko dituela esan izana egotzi dio Rafael Hernandok Sanchezi, eta Alderdi Popularraren "lorpenak" zerrendatu ditu, besteak beste, Carles Puigdemont presidente kargutik kendu izana.

Eskerrak eman dizkie Pedro Sanchezek zentsura mozioari babesa eman dioten alderdiei. Eskerrak baita ere alderdikideei, eta lanean hasteko eskaera guztiei.

Oharra Kongresuko korridoreetan

‘Voto sí solo para echar a M. Rajoy’. Horrela sartu da Diego Cañamero (@DcaValle) diputatua Kongresura. Rajoyren arrastorik ez korridoreetan ezta hemizikloko eserlekuan ere. #MociónCensura #ZentsuraMozioa pic.twitter.com/g4m1pYPwDl

— Oihan Vitoria (@oihanvito) 2018(e)ko ekainaren 1(a)

Rajoy gabe hasi da Kongresuko eztabaida. Margarita Robles bozeramaile sozialista oraintxe hizketan.

Rajoyk Madrilgo jatetxe batetik jarraitu zuen atzo arratsaldean Kongresuko eztabaida. Goizean, aldiz, ez zuen galdu oposizioari erantzuteko aukera.

Ordu gutxi batzuk geratzen zaizkio Mariano Rajoy gobernuburuari agintean. Eguerdiko 12:00ak aldera egingo dute zentsura mozioaren bozketa, eta, ezustekorik ezean, arazorik gabe egingo du aurrera.