EUSKARA

Euskaraldia babestu dute Bilboko, Gasteizko, Donostiako eta Iruñeko alkateek

Agerraldia egin dute elkarrekin, eta euskararen erabileran beste aurrerapauso bat emateko deia egin dute. Euskal Herri osoko 350 udalerrik eman dute izena.

Lau alkateak, Eusko Jaurlaritzako eta Euskaltzaleen Topaguneko ordekariekin.
Lau alkateak, Eusko Jaurlaritzako eta Euskaltzaleen Topaguneko ordekariekin. Garikoitz Goikoetxea

Garikoitz Goikoetxea -

2018ko ekainak 6

Babes gero eta sendoagoa biltzen ari da Euskaraldia. Joan den astean dozenaka entitatek hartu zuten konpromisoa Euskaraldirako erraztasunak jartzeko. Hego Euskal Herriko hiriburuetako alkateek hartu dute orain: Bilboko alkate Juan Mari Aburtok, Gasteizko Gorka Urtaranek, Donostiako Eneko Goiak eta Iruñeko Joseba Asironek. Haiekin batera izan dira Eusko Jaurlaritzako ordezkariak eta Euskaltzaleen Topagunekoak ere.

Nabarmendu dute hiriburuetan bizi direla euskaldun asko, gero eta gehiago, eta erabileran erronka handia dagoela eremu horietan. “Hiriburuek, euskararen lurraldeetako hirigune nagusiek, gune eroso eta abegikorrak izan behar dute euskararen erabilera bultzatzeko bidean. Euskaraldia ekimena oso lagungarria izango da norabide horretan”.

Orain arte 350 udalerri eman dute izena Euskaraldirako. Zazpi herrialdeetako herriak daude tartean, eta zazpi hiriburuak. Gainera, 10.000 biztanletik gorako udalerri guztietan daude martxam Euskaraldia antolatzeko batzordeak.

Azaroaren 23tik abenduaren 3ra arte izango da abian Euskaraldia, eta udazkenean zabalduko dute herritarrek izena emateko epea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna