Gasteizko BSH lixatzeko zentroen egilea salgai jarri zuen Bosch multinazionalak orain urtebete, eta horrekin batera mobilizazioei ekin zieten lantegiko 250 langileek. Zuzendaritzak plantaren itxiera programatu zuela salatu zuten beharginek, eta negoziazio prozesu bat abiatu zen, eroslea aurkitu bitartean proiektu berri bat martxan jartzeko. Akordioa ere lortu zela azaldu du batzordeak, baina sei hilabete iragan eta gero, zuzendaritzak bete gabe jarraitzen duela esan du, gaur, eta egoera horren aurrean lanuzteak eta grebak iritsiko direla iragarri du.
"Zuzendaritzak joko arauak aldatu ditu, eta erdietsi genuen akordioa ez du sinatu. Salgai jartzeak kaltea besterik ez dio egin enpresari, eta benetako informazioa ukatzen zaigu. Ematen du zuzendaritzak denbora pasatzea baino ez duela nahi, eta horrek arrisku bizian jartzen du plantaren geroa".
Horregatik, batzordeak gaur bertan hasiko diren bi orduko lanuzteen berri eman du. Ekainaren 13an errepikatuko da lanuzte hori, eta 20an, berriz, egun osoko grebara deitu dute. Bi egun horietan, langileak Gasteizen barna manifestatuko dira. "Enpresak bere hitza betetzea eskatzen dugu, gardentasunaz aritzea eta bermeak ematea geroa egon dadin BSHrentzat".
