Altsasuko auzia

Zuzenbide adituen plataformako kideen agerraldia eskatu dute parlamentuan

Geroa Baik, EH Bilduk, Ahal Dugu-k eta Ezkerrak eskaera bat erregistratu dute parlamentuan, plataforma horretako kideak berehala bertara daitezen auziari buruz euren ikuspuntua agertzeko.

Altsasuko auzian zigortutako gurasoek antolatutako manifestazioa, joan den asteartean, Altsasun (Nafarroa). /
Altsasuko auzian zigortutako gurasoek antolatutako manifestazioa, joan den asteartean, Altsasun (Nafarroa). / Idoia Zabaleta/Foku

Berria -

2018ko ekainak 8

Zuzenbideko Profesionalen Plataformak adierazpen bat kaleratu zuen Altsasuko auziaren neurrigabekeria salatzeko, eta laukoak eskaera bat egin du parlamentuan, "berehala" joan daitezen.

Lau alderdiek gogorarazi dute orain arte egindako mobilizazioetan auzi horretan justizia egitea eta neurriz jokatzea aldarrikatu dutela. "Gazte horiei eta euren senideei pasarazi nahi dieten egoera hau guztia logikaz kanpo dago. Beste tokietan oso modu desberdinean epaitzen dira".

Gaur, elkarretaratzea parlamentuan

Eguerdian, Altsasuko Gurasoak plataformak deituta, elkarretaratzea egin dute parlamentu aurrean. Edurne Goikoetxeak, Ainara Urkijoren amak, salatu du iragan asteko epaiarekin euren seme-alabei homizidioaren pareko zigorrak ezarri dizkietela.

Gainera, astearteko atxiloketekin Guardia Zibilak "mina" egin eta Altsasuren irudi txar bat eman nahi izan duela. Fiskalak ihes egiteko arriskua aipatu zuen, eta Goikoetxeak Iñaki Abaden jarrerarekin kontrastatu zuen: astelehenean hasi zen berriro lanean, eta asteartean, guardia zibilak etorri zirenean, bere burua entregatu zuen.

Azken egunetan, auzia salatzeko deialdi ugari egiten ari dira, bai Euskal Herrian, bai Euskal Herritik kanpo. Manifestazio nagusia ekainaren 16an egingo da, Iruñean, 17:00etan. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna