Enpresak

CAFek 87 tranbia egingo ditu Oslorako

200 milioi eurora iritsi daitekeen kontratuaren negoziazioa hasiko du orain CAFek Norvegiako hiriburuko garraio operadorearekin. 60 tranbia gehiago egiteko aukera ere jasotzen du kontratuak.

Urbos tranbia bat Oslo kaleetan irudikatuta.
Urbos tranbia bat Oslo kaleetan irudikatuta. CAF

Irune Lasa -

2018ko ekainak 12

Beasaingo tren konpainiak irabazi du tranbien merkatuan aurtengo lehiaketen artean bolumen handiena zuen kontratua. Osloko (Norvegia) hiri garraioko operadoreak, Spoveienek, CAF aukeratu du bere sareko tranbiak egiteko. 87 tranbia izango dira, baina aukera zabalik dago gero beste 60 tranbia gehiago egiteko. Sporveien eta CAF orain hasiko dira 200 milioi eurora iritsi daitekeen kontratua negoziatzen.

Urbos gamako tranbiak dira CAFek Oslorako egingo dituenak eta egun Norvegiako hiriburuko tranbia sareko sei lineatan dabiltzan tranbiak ordezkatuko dituzte. Zoru baxuko tranbiak dira Urbosak eta Oslon bakarrik ez, beste zenbait hirietan ere ibiliko dira laster, hala nola, Amsterdamen (Herbehereak), Flandrian, Luxenburgon eta Birminghamen (Erresuma Batua). Urbos gama munduko lider bihurtu da zoru baxuko tranbien merkatuan, CAFk orain gutxi irabazitako lehiaketa horiei esker. 

Dagoeneko Urbos gamako tranbiak Naonedeko (Bretainia) kaleetan dabiltza eta horien antzekoak izango dira Beasaingoek Oslorako egingo dituztenak. 34 metroko luzera izango duten unitateak, seina ate bikoitzekin. CAFen arabera, tranbien diseinuak "Norvegian ohikoak diren baldintza klimatiko gogorrei aurre egiteko ezaugarri bereziak eta azken belaunaldiko sistemak izango ditu". Horrez gain, CAFek nabarmendu du Urbos tranbiak unitatearen bizitza osoan ingurumeneko inpaktua gutxitzeko diseinatuta daudela, "sorrera, fabrikazio eta energia kontsumotik hasi, eta birziklagarritasunera arte".

CAFek Norvegian lortzen duen bigarren kontratua da hau. Gaur egun, proba fasean daude Flytoget enpresak eramango dituen Oaris gamako abiadura handiko unitateak. Horiek Gardemoen aireportua eta Oslo erdigunea lotuko dituzte express zerbitzuan.

Beasaingo tren konpainiaren eskari zorroak handitzen jarraitzen du, 2018. urtearen lehen zati honetan hainbat kontratu lortuta: metro unitateak egingo ditu Napoli (Italia), Bartzelona (Katalunia) eta Amsterdamerako (Herbehereak). Tranbiak Luxenburgo, Friburgo (Alemania) eta Lunderako (Suedia) eta orain egun gutxi lortu du Galesen diesel trenak egiteko kontratua.  

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna