AEB-ak

NBEko Giza Eskubideen Kontseilua utzi dute AEBek

Eskubideak urratzen dituzten herriak "babestu" eta errespetatzen dituztenei "eraso" egitea egotzi dio Washingtonek Nazio Batuen Erakundeari.

Nikki Haley, AEBen enbaxadorea NBEko Giza Eskubideen Kontseiluan. /
Nikki Haley, AEBen enbaxadorea NBEko Giza Eskubideen Kontseiluan. / Justin Lane/EFE

Arantxa Elizegi Egilegor -

2018ko ekainak 20

Klima Aldaketaren Parisko akordioa izan zen lehenik, Iranekin sinatutako akordio nuklearra ondoren, eta Nazio Batuen Erakundeko Giza Eskubideen Kontseilua orain. AEBak dira kontseilu horretatik beren borondatez irten diren lehen estatua.

Nikki Haley enbaxadoreak iragarri du Washingtonen erabakia, eta giza eskubideak errespetatzen dituzten herrialdeen aurka egitea egotzi dio erakundeari: "Aurten, aurreko urteetan bezala, NBEko Giza Eskubideen Kontseiluak Israelen aurkako bost ebazpen onartu ditu, Ipar Korearen, Siriaren eta Iranen aurka onartuakoak baino gehiago". Hala, eskubideekiko "arbuioz" jokatzea egotzi die Haleyk Kontseiluko kideei.

Giza Eskubideetarako goi ordezkari Zeid Radda al Husseinek harridurarik gabe hartu du AEBen erabakia, nahiz eta aitortu duen "etsigarria" izan dela. "Giza eskubideen egungo egoera kontuan izanik, AEBek aurrera egin beharko lituzkete urratsak, eta ez atzera". AEBetako Estatu idazkari Mike Pompeoren iritziz, ordea, NBE bera da "gehiegikeriak" onartzen dituena, "erantzuleak errugabetuz".

Kritiko agertu da Erresuma Batuko Atzerri ministro Boris Johnson ere, eta tamalgarritzat jo du erabakia. Hark aitortu du Erresuma Batuak ere nahiko lukeela Giza Eskubideen Kontseiluan aldaketak egitea, baina iritzi dio horretarako beharrezkoa dela haren baitan lan egitea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna