Aurrekontu politika

Espainiako Gobernuak gastu araua berrikusiko du

Administrazioen gastuaren hazkuntza mugatzeko araua "berrikusi eta haren kalkulua egokitzeko konpromisoa" azaldu du Maria Jesus Montero Ogasun ministroak.

Maria Jesus Montero gaur Diputatuen Kongresuan.
Maria Jesus Montero gaur Diputatuen Kongresuan. Emilio Naranjo / EFE

Irune Lasa -

2018ko ekainak 20

Espainiako Gobernu berriak jarraitu egingo du aurrekontuen egonkortasunerako Europako Batasunetik agindutako arauak betetzen. Hori azaldu du gaur Maria Jesus Montero Ogasun ministroak Diputatuen Kongresuan egindako agerraldian. Hori bai, arau horietako bat behintzat, administrazioen gastuaren hazkundea mugatzen duen gastu araua, "berrikusi eta haren kalkulua egokitzeko konpromisoa" ere agertu du Monterok, "kalkulu hori gardenagoa izan dadin".

Berrikuste hori beti ere "testuinguru europarrean" egingo dela iragarri du Ogasun ministroak eta "neurri guztiak egonkortasunaren arauak errespetatuz" aztertuko direla, baina Monterok beharrezko ikusi du "kalkulu kolektiboago bat". Izan ere, gero eta gehiago dira euren altxortegietan superabitak izanda, diru hori krisi garaiko murrizketak arintzeko edo lan arruntak egiteko erabiltzea debekatuta duten tokiko eta erkidegoetako administrazioak. Gastu arauak jada baldintzatu egiten ditu hainbat euskal administrazioren aurrekontuak.

Zenbait produkturen balio erantsiaren zerga murrizteari buruz ere galdetu diote Ogasun ministro berriari. Ildo horretan, bere asmoa azterketa bat egitea da, zenbait BEZa jaitsi daitezkeen ikusteko. Kultur gaien eta emakumezkoen higiene pertsonaleko produktuen BEZa jaisteko aukerak aipatu ditu, zehazki, Monterok.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna