Askatasunaren aurkako ikurrak eta aipuak aipatzen ditu foru legeak, "gainditu beharreko iragan bat" ordezkatzen dutenak. Horiek dira Nafarroako Gobernuak kendu nahi dituenak. Diktadura goraipatzen duten ikur eta aipamenak erakin eta eremu publikotik ezabatzea da helburua, eta hori egiten ez dutenentzako zigor ekonomikoak aurreikusten ditu araudiak. Hala, agindua betetzeko urtebeteko epea ezarri dute.
Ikurrei eremu publikoetan eustea biktimekiko iraingarritzat dute lauko gobernua sostengatzen duten alderdiek, eta hori jarri dute argudio araua onartzerakoan ere. Onartutako testuak gogora ekartzen ditu gerra garaian eta diktaduran jazarriak izan zirenak, eta nabarmentzen du herritarrek eskubidea dutela "eremu publikoetako ikurrak elkarbizitzarako aukera sor dezaten, eta ez daitezen iraingarri edo laidogarriak izan".
Geroa Bai, EH Bildu, Ahal Dugu, Ezkerrra eta PSNren aldeko botoekin onartutako testuak —kontra bozktau dute UPNk eta PPk— zehazten du legea betetzen ez dutenen aurkako isunak 2.000 eta 150.0000 euro artekoak izan daitezkeela. Isun larriena jaso dezaketen arau-hausteen artean leudeke, besteak beste, desagertuen gorpuak dauden tokietan baimenik gabe eraikitzea edota memoria historikoarekin lotutako guneak suntsitzea.
Hala, 10.000 euro arteko isuna ekarriko luke ikur frankistak kentzeko ebazpenak ez betetzeak eta desagertutakoen gorpuzkien berri izan eta horien aurkikuntza ez jakinarazteak. Arau-hauste larria litzateke, baita ere, estatu kolpea edota diktadura babestu zuten pertsonen omenezko ikurrak ezartzea.
