Kooperatibak

Mondragoneko industria alorrak 2.600dik gora lanpostu sortu ditu iaz

Kooperatiba talde osoak 80.800 langilerekin itxi zuen 2017. urtea; 11.280 milioi eurotik gorako salmentak izan ditu, aurreko urtean baino %1 apalagoak.

Mondragon taldeko Matrici kooperatibaren lantegi bat.
Mondragon taldeko Matrici kooperatibaren lantegi bat. Mondragon

Irune Lasa -

2018ko ekainak 22

Mondragon taldearen adar sendoenetakoa industria kooperatibena. Alor horrek iazko urtea 5.547 milioi euroko fakturazioarekin amaitu du, aurreko urteko kopurua %8,1 hobetuta. Hala ere, emaitzetan beherakada izan dute kooperatiba industrialek. Aurreko urtean baino %9 gutxiago irabazi du alorrak, 233 milioi euro, "batez ere lehengaien prezioak gora egin duelako, euroaren balioaren handitzeagatik eta atzerrian plantak ireki direlako ere".

Langile kopuruan ere gora egin dute iaz Mondragonen industria kooperatibek. 2.691 lanpostu gehiagorekin, kooperatiba horiek urtea 37.020 langilerekin itxi dute. Taldea pozik dago bere industriako kooperatibetan enpleguak azken urteetan izandako bilakaerarekin. Azken bosturtekoan 7.000tik gora lanpostu sortu dituzte, eta horietatik %55 Euskal Herrian sortu dira. Mondragonen arabera, "gainera, kooperatibek ondo asmatu dute Fagor Etxetresnak itxi izanak eragindako 1.895 bazkideetatik ia guzti-guztiei enplegu irtenbideak ematen, batez ere birkokapenen eta aurretiko erretiroen bidez".

Nazioartekotzearen apustuarekin jarraitu dute iaz Mondragoneko industria kooperatibek. Dagoeneko, arloaren salmenten %70 egiten dira Euskal Herritik eta Espainiatik kanpo. Filial berriak ere zabaldu dira iaz, Txinan, Mexikon eta Norvegian. Mondragoneko industria alorrak 143 filialekin itxi zuen iazko urtea.

Mondragoneko kooperatibek, oro har 80.818 langile dituzte, iaz baino %0,7 gehiago. Taldearen salmentak 11.280 milioi eurokoak izan dira iaz, 2016. urtean lortutakoak baino %1 apalagoak. Iaz Mondragonek 451 milioi euroko inbertsioak egin zituen.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna