Merkataritza

EBren autoei %20ko muga zerga ezartzeko mehatxua egin du Trumpek

Gaur jarri dira indarrean Europako Batasunak AEBetako hainbat produkturi ezarritako tarifak.

BMW auto bat, Detroiteko auto azokan
BMW auto bat, Detroiteko auto azokan Erik S. Lesser / Efe

Iker Aranburu -

2018ko ekainak 22

Txinarekin eta ezik, Europako Batasunarekin merkataritza gerra handitzeko asmoa du Donald Trump AEBetako presidenteak. Txio baten bidez mehatxu egin du EBko auto guztien inportazioei %20eko muga zerga bat ezartzeko aukera. Horren bitartez batez ere lagundu nahi ditu bere herrialdeko luxuzko autogileak, hala nola, Cadillac eta Lincoln.

Gaur egun, EBn ekoitzi eta AEBetan saltzen diren Mercedes, BMW eta beste autoek %2,5eko tarifa ordaintzen dute. Baina Trump kexu izan da AEBetan egindako kotxeek %10eko muga zerga ordaintzen dutela EBn. Bruselak erantzun dio beste arlo batzuetan tarifa handiagoak ordaintzen dituztela Europako produktuek AEBetan, AEBetakoak Europan baino.

Ekainaren 1etik indarrean dira AEBek EBko altzairu eta aluminio inportazioei ezarritako muga zergak —%25 eta %10, hurrenez hurren—, baina askoz eragin handiagoa izango luke autoei ezarritako tarifak, autogintza baita kontinente zaharreko industria indartsuena. Bereziki kalte egin diezaieke autogile alemaniarrei —Mercedes, BMW, VW taldea—, haienak baitira AEBetan saltzen diren auto europar gehienak. Horregatik, Trumpen txioak argitaratu eta berehala, kolpe ederra jaso dute burtsan.

Euskal Herrira ere irits daiteke olatua. Iaz, 6.000 furgoneta bidali zituen Daimlerrek Gasteiztik AEBetara. 120 milioi euroko esportazioak dira. Mercedesek Charlestonen egiten ditu azken muntaketa lanak. Baina baliteke horrekin ere ez libratzea. Volkswagenek ez du Landabengo Polorik saltzen AEBetan, ordea. Ikusteko dago balizko muga zerga horrek autoen osagaiei ere nolabait eragingo ote liekeen, horietan ekoizle oso garrantzitsua baita Euskal Herria.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna