Tortura

"Eragindako mina aitortzeko" eskatu diote Grande Marlaska ministroari

Torturaren Biktimen Nazioarteko Egunean agerraldia egin dute Grande Marlaska instrukzio epaile zelarik torturak salatutako zenbait herritarrek.

Amaia Izko abokatua, Grande-Marlaskaren aurrean torturak salatu zituztenetako batzuk atzean dituela. /
Amaia Izko abokatua, Grande-Marlaskaren aurrean torturak salatu zituztenetako batzuk atzean dituela. / June Prieto/Foku

Gotzon Hermosilla -

2018ko ekainak 26

Amaia Izko abokatuak esan duenez, herritar ugarik "izua, beldurra eta oinazea" sentitu zuten Fernado Grande Marlaska epailea Espainiako Barne ministro izendatu zutela jakitean. Izan ere, Grande Marlaskak instrukzio epaile ziharduela 223 atxilotuk torturak eta tratu txarrak salatu zituzten, eta horren aurrean "ez ikusiarena" egin zuen haien lekukotzak entzun zituenean edo "mespretxuz" hartu zituen testigantza horiek.

Izkok gogorarazi du 2004tik Giza Eskubideen Europako Auzitegiak bederatzi aldiz zigortu duela Espainia torturak ez ikertzeagatik, eta bederatzi kasu horietatik seitan Grande Marlaska izan zela atxilotuen eskubideak bermatzeko erantzukizuna zuena. Tortura testigantza horien artean "kasu lazgarriak" daude, esaterako, Beatriz Etxeberriak salatutako bortxaketa, edo Igor Portu eta Mattin Sarasolarena —kasu horretan, Estrasburgoko Giza Eskubideen Europako Auzitegiak tratu txarrengatik zigortu zuen Espainia—.

Izkok eskatu dio Grande Marlaskari "eragindako mina" aitor dezala, eta gogorarazi du kasu askotan atxiloaldian lorturiko deklarazio eta autoinkulpazioak izan direla herritarrak espetxera bidaltzeko erabilitako froga bakarra. Kasu horiek guztiak berriro aztertu behar direla esan du Izkok, eta erantsi: "Espainiako presidente Pedro Sanchezek eta Grande Marlaskak aukera paregabea dute justizia trantsizionala aplikatzen hasteko".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna