autogobernua

Botere publikoen eta erregimen ekonomikoaren atalak, adostuta

EAJk eta EH Bilduk adostu dituzte bi kapituluak. Hurrengo eztabaidagaia eskubide eta askatasunei buruzkoa izango da, eta espero dute datorren astean edo hurrengoan ixtea estatus politikoaren oinarriei buruzko eztabaida.

Eusko Legebiltzarreko Autogobernu Lantaldearen joan den asteko bilera.
Eusko Legebiltzarreko Autogobernu Lantaldearen joan den asteko bilera. Juanan Ruiz / Foku

Jon O. Urain -

2018ko ekainak 27

Hitzaurrea, Atariko Titulua eta eskumenei buruzkoa adostu ostean, botere publikoen eta erregimen ekonomikoaren kapituluetan ere ados jarri dira EAJ eta EH Bildu.

Botere legegileaz, betearazleaz eta judizialaz gain, "botere herritarraren" kontzeptua ere txertatu dutela azpimarratu du Maddalen Iriarte EH Bilduko bozeramaileak: "Uste dugu gainditu egin behar dela gobernuaren eta herritarren arteko harreman klasikoa, zeinaren arabera erabaki guztiak gobernuaren esku geratzen baitira". 

Hala ere, legebiltzarreko bi indar politiko nagusiak ez dira guztiz bat etorri. Jeltzaleek justizia administrazio "propioa" sortzea proposatu dute, baina Espainiako Auzitegi Gorenaren esku utzita zenbait gaietan doktrina bateratzeko gaitasuna. Aldiz, EH Bilduk baztertu egin du Espainiako sistema judizialarekiko "mendetasuna", eta boto partikularra aurkeztu du.

Araba, Bizkai eta Gipuzkoako estatus politikoaren oinarriak adosten ari da Eusko Legebiltzarreko Autogobernu Lantaldea, eta, gaurko bileran, bi atali buruzko eztabaida itxi dute. Orain arte asteazkenero batzartzen ari dira, baina datorren astean bi bilera egingo dituzte, oinarriei buruzko eztabaida datorren asterako ixteko; beranduenera, uztailaren 8tik 15eko asterako.

Hurrengo eztabaidagaia eskubide eta askatasunei buruzkoa izango da, eta Elkarrekin Podemosek sintesi dokumentua aurkeztu du gaurko bileran. EAJk prestatuko ditu estatusaren erreformari, nazioarteko harremanei eta xedapen gehigarriari buruzkoak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna