Atzo, ostirala, aldatu zuten ziegaz Manu Azkarate presoa. Erregistroak egin zituzten bera egon ohi den moduluan; funtzionarioek ez zuten astirik izan bere ziega lehen zegoen moduan uzteko, eta hori berak egin zezala agindu zioten Azkarateri, gertukoek salatu dutenez. Horri uko egin ondoren, zimitzez beteriko batera eraman zuten. Azkarateren abokatuak salaketa jarriko du Espainiako Auzitegi Nazionaleko Espetxe Zaintzako epailearen aurrean.
Tratamendu mediko zehatza eta ohikoa behar du Azkaratek, eta Alcala Mecoko espetxean (Madril) dago ingresatuta. Hara eraman aurretik, Soto del Realen (Madril) egon zen, eta bi alditan eraman behar izan zuten ospitalera, espetxeko bizi baldintzak direla-eta osasuna okertu zitzaiolako.
1980ko hamarkadako auzi batzuengatik epaitu eta zigortu nahi du Espainiak Azkarate, eta horregatik atxilotu zuten 2016ko abenduaren 15ean, Marseillan (Frantzia).
