Liburutegiak

Liburubila aurkeztu dute, kultura edukietarako “leihatila bakarra”

845.000 liburu, 16.250 liburu digital eta 67.267 ikus-entzunezko artxibo izango dituzte eskuragarri herritarrek bestelako eduki kulturalekin batera. Bilatzaileak erraza eta arina izatea du helburu.

Liburubila atari digitala aurkeztu dute
Liburubila atari digitala aurkeztu dute June Prieto /Foku

Uxue Gutierrez Lorenzo -

2018ko uztailak 12

Joxean Muñoz Eusko Jaurlaritzako Kultura sailburuordeak eta Mikel Aizpuru Kultura Ondarearen zuzendariak aurkeztu dute proiektua, Euskadiko Artxibo Historikoan emandako prentsaurrekoan. Duela urtebete ekin zioten proiektua garatzeari, eta Finlandian sustatutako antzeko ekimen bat izan dute eredu. Zerbitzuaren doakotasuna azpimarratu nahi izan dute, edozein herritarrentzat eskuragarri egotea baita helburua. Horrez gain, bilaketa “irakurlearen baldintzetara egokitzeko” aukera dagoela adierazi du Aizpuruk. Bilaketa zehatzak ahalbidetzen ditu, kultura kontsumoa erraztuz. 

Kultura klik bakarrean. Hori da, batik bat, atari digitalaren helburua, kultura eskaintza zabala webgune bakarrean batzea. Euskadiko Irakurketa Sare Publikoa osatzen duten 500 liburutegiekin eta eLiburutegiarekin lotua dago Liburubila, eskaintza fisikoa zein digitala ahalbidetuz. Jada martxan da Liburubila, edozein herritarrentzat eskuragai.

Pirateriari aurre eginez

Zerbitzuaren doakotasunarekin batera, egile eskubideen garrantzia azpimarratu nahi izan dute. Izan ere, herritarrentzat kosturik izango ez duen arren, Jaurlaritzak dagozkien ordainketak egingo dizkie sortzaileei. Horrez gain, filmak estreinatu eta urtebetera izango ditu eskuragarri erabiltzaileak, ekoizpen etxeekin izan ditzaketen konpetentzia arazoak ekiditeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna