Osakidetza

Sistema gardena eskatu dute Osakidetzeko azterketan iruzurra salatu zuten medikuek

Maria Jesus Mujika, osakidetzako zuzendariak, egindako adierazpenak ez ditu iruzurra azaleratu zuten medikuak asebete.

Hainbat lagun osakidetzak lan eskaintza publikorako azterketak egiten./
Hainbat lagun osakidetzak lan eskaintza publikorako azterketak egiten./ Marisol Ramirez/FOKU

Ainhoa Larretxea Agirre -

2018ko uztailak 12

Atzo jakinazazi zuen Osakidetzak lan eskaintza publikoko (LEP) hiru espezialitateko hautaprobak berriz egingo dituztela. Ekaina hasieran hasi zen auzia, sindikatuek Osakidetzako azterketetan iruzurra egon zela salatu zutenean. Maria Jesus Mujika, osakidetzako zuzendari nagusia, atzo atera zen prentsaurrera eta azterketetan ez zela filtraziorik izan adierazi zuen. Azterketetan eta zuzentze metodoetan "akatsak" egon direla onartu zuen, ordea. Marta Macho izan zen irregulartasunak salatu zituen medikuetako bat eta Mujikaren adierazpenek ez dute asebete. Sinistezina egiten zaio akatsa zuzenketan egotea: "Ezinezkoa da LEP osoan iruzurrak egotea eta erantzulerik ez azaltzea. Arazoa zuzenketan dago? Benetan?" galdetu du medikuak.    

Azterketak filtratu zirenaren zantzu "argiak" daudela adierazi du Machok: "Azterketen filtrazioa gauza jakina da, mundu guztiak daki, egoiletza hasten duzunetik erraten dizute". Gaineratu du jendeak ez duela salatzen "barneratuta" duen zerbait delako. Azterketak zuzentzeko prozesu "gardena" eskatu du Osakidetzako medikuak. Hiru azterketak errepikatzea aurrerapausoa den arren sistema bera dela aldatu behar dena gaineratu du: " Azterketa sistema gardena eskatzen dugu, oraingo sistema guztia zalantzan dago eta honek ezin du horrela jarraitu".

Aztertzeko metodoa eta tribunalak zein diren jakin arte mesfidati azaldu da medikua: "Ez badute iruzurra berriz ez gertatzeko neurririk hartzen azterketa berriko emaitzak ere ez dira fidagarriak izango". Proba berriak egiterakoan, familia medikuko espezialitatea erreferentziatzat hartzea eskatu dio Osakidetzari, kasu honetan ez delako "irregulartasun" kasurik atzeman. 

Maria Jesus Mujika, osakidetzako zuzendari nagusiak atzo prentsaurrean azaldu zuenez, kardiologia, anestesia eta angiologia espezialitateko azterketa batzuk dira berriz egingo dituztenak. Kirurgia plastikoa eta konpontzailea kategoria ere susmopean zegoen, baina, egindako azterketen emaitzak onartu eta prozedurarekin aurrera jarraitzea erabaki dute. ESK-k eta LABek iruzurra salatu dute beste hainbat probatan ere.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna