Txirrindularitza

Daniel Martin izan da nagusi Bretainiako Harresian

Daniel Martinek (UAE) azken kilometroan egindako erritmo aldaketa ezin izan du inork jarraitu eta bakarrik helmugaratu da. Mikel Landa izan da euskaldunik onena 16. postuan (3ra). Tom Dumoulin (Sunweb) eta Romain Bardetek (Ag2r) denbora galdu dute. Greg van Avermaetek mailot horiari eutsi dio.

Berria -

2018ko uztailak 12

Espero bezala, Bretainiako Harresian erabaki da Tourreko seigarren etapa. Azken kilometroan jo du eraso bortitza Daniel Martinek eta inor ez da haren gurpila jarraitzeko gai izan. Atzetik Pierre Latour (Ag2r) eta Alejandro Valverde (Movistar) izan ditu. Txirrindulariek muinora egin duten lehen igoeran ez da ezer pasa tropelean; kontrol lana eta zuhurtzia nagusi. Gaina harrapatuta Jack Bauerrek (Mitchelton) egin du inora ailegatu ez den ahalegina. Goitik beherakoan, Tom Dumoulinek gurpila aldatu behar izan du eta ez du tropelera itzultzeko denborarik izan. Taldekideen laguntzaz, Daniel Martinekiko 53 segundora helmugaratu da. Romain Bardetek ere arazo mekanikoak izan ditu eta Tony Gallopin taldekidearen bizikleta hartu behar izan du. 31 segundora helmugaratu da. Sky bikain kokatuta sartu da azken bi kilometroetara. Igoeraren hasiera gogorrean egon diren erasoekin ez da tarterik zabaldu. Richie Porte ahalegindu da. Tropel buruan Omar Fraile (Astana) ere agertu da. Daniel Martinek eraso bakarra jo du, indartsu eta une egokian. Azken kilometroa bakarrik egin du. Adam Yates (Mitchelton), Pierre Latour eta Geraint Thomas (Sky) saiatu dira zuloa ixten, baina alferrik. Chris Froomek Martinekiko 8 segundo galdu ditu.

Helmugarako 100 kilometro falta zirela haize babesak izan dira tropelean. Batez ere, Quick-Step eta BMC taldeek gogor jo dute tropel buruan. Atzean, bigarren multzo batean gelditu dira, besteak beste Mikel Landa (Movistar) Nairo Quintana (Movistar) eta Vincenzo Nibali (Bahrain). Hala ere, laster itxi dute zuloa. Gehiago kosta zaio Primoz Roglici (LottoNL-Jumbo) tropelarekin bat egitea. Roglic are atzerago zegoen. Egoera baretuta, denek bat egin dute.

Eguneko ihesaldiak ez du zorterik izan gaurkoan. Izan ere, tropeleko urduritasun eta abiaduraren ondorioz azkar murriztu da aldea. Tourreko lau talde gonbidatuek izan dute presentzia ihesaldian. Bost ausartak hauek izan dira: Laurent Pichon (Fortuneo-Samsic), Damien Gaudin eta Fabien Grellier (Direct Energie), Anthony Turgis (Cofidis) eta Dion Smith (Wanty-Groupe Gobert).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna