Euskal presoak

Foro Sozialak eragileekin "konfiantzak eraikitzen" jarraitu nahi du

Foro Sozial Iraunkorreko kide Teresa Todak eta Juanjo Espinak azaldu dutenez, azken asteetan harremanak izan dituzte eragile ugarirekin; bilera horietatik ondorioztatu dute "adostasun sendo eta zabala" dagoela konponbiderako premiazko agendaren inguruan.

Foku

Gotzon Hermosilla -

2018ko uztailak 24

Azken asteetan, Foro Sozial Iraunkorrak kontaktuak izan ditu Eusko Jaurlaritzarekin, Nafarroako Parlamentuko presidente Ainhoa Aznarezekin, Eusko Legebiltzarreko Giza Eskubideen Batzordeko presidente Ana Oregirekin, arartekoekin eta EPPK Euskal Preso Politikoen Kolektiboko ordezkariekin. Horrez gainera, gizarte zibileko eragile ugarirekin eta 72 pertsona esanguratsurekin ere trukatu dituzte iritziak. Laster Nafarroako Gobernuarekin eta Espainiako Gobernuak EAEn zein Nafarroan dituen ordezkariekin ere bilerak egitea espero dute.

Bilera sorta horretatik ondorioztatu dute "adostasun sendo eta zabala" dagoela "konponbiderako premiazko agenda" osatzen duten puntuen inguruan —gaixo diren eta 70 urte baino gehiago dituzten presoen auzia, urruntzearen amaiera, graduen aldaketa, Frantziako kartzeletan betetako zigorrak aintzat hartzea eta espetxe eskumenen transferentzia— eta "korapiloa askatzen" hasi dela. Espainiako Gobernua ere "bere bide orria marrazten" ari dela deritzote, oraindik "gauza asko definitzeke" dauden arren.

Bilera horietatik guztietatik, bereziki nabarmendu dute Alboroteko espetxean (Granada, Espainia) EPPK-ko kide Jon Olarra eta Ainhoa Mujikarekin egindakoa. Esan dutenez, bilera egiteko baldintzak ez ziren egokienak izan, baina, hala ere, hainbat ondorio positibo atera dituzte handik: presoek "itxaropenez" hartu dutela egoera berria, nahiz eta "zuhurtziari" eusten dioten; presoak prest daudela euren ibilbidea espetxe legediaren barruan egiteko; prest daudela egindako minaren aitortzan ere urratsak egiteko, eta, azkenik, "bide orriaren diseinuan" ere ekarpenak egiteko prest daudela.

Foro Sozialak uste du ezinbestekoa dela orain arte lortutako adostasun instituzional, politiko eta sindikalari eustea. Era berean, "presoei entzun" egin behar zaiela deritzote, eta garrantzi berezia eman diote "gizarteratze egitasmo bat" lantzeari eta hori preso guztiek baliatzeko modukoa izateari. Azkenik, "garaile eta garaituen eskemetatik" urrundu egin behar dela uste du Foro Sozialak, "protagonismoak eta kalkulu elektoralak alde batera utzita".

Etxerat-eko Patrizia Velez bat etorri da Foro Sozialaren balorazioarekin, baina berriro gogorarazi du presoen senitartekoek ezin dutela sufrimenduaz hitz egin iraganeko kontua balitz bezala: "Gure sufrimendua orainari lotuta dago", esan du. Itxaropentsu agertu bada ere, gogora ekarri du eskubideak "urratu edo errespetatu" egiten direla, "eta oraintxe bertan Espainiako Gobernuak eskubideak urratzen segitzen du".

Sareko bozeramaile Joseba Azkarragak, berriz, "itxaropenez eta zuhurtziaz" hartu ditu azken asteotako adierazpen eta mugimenduak, eta dei berezia egin die epaileei: "Askotan arlo politikoari egiten diogu enplazamendua, baina arlo judizialak ere badu zeresana. Legea betetzea ezin da askoz gehiago atzeratu".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna