Politika

Remi Aiestaranen omenezko oroitarriari eraso egin diote

Svastika bat margotu dute Villabonako alkateorde zenari eskainitako oroitarriaren gainean.

Berria -

2018ko uztailak 25

Remi Aiestaran ANVko kidea 2009ko uztailaren 31n hil zen, 27 urterekin, euskal presoen aldeko elkarretaratze batean parte hartzear zela. Egun batzuk lehenago, elkarretaratzea debekatu egin zuen Espainiako Auzitegi Nazionalak, eta kontzentrazioa ez zen egin azkenean; baina, hala ere, lekukoek azaldu zuten herriko plazan zegoen jendea identifikatzen hasi zela Ertzaintza. Festa giroak normal jarraitu zuen arren, ertzainek han jarraitzen zutela ikusita, Aiestaran ertzainengana joan zen negoziatzera, lekuko batzuen arabera. Orduan, ondoezik sentitu zen 27 urteko gaztea. Ertzainetako bat Aiestaran suspertzen saiatu zen, baina, azkenean, Tolosako ospitalean (Gipuzkoa) hil zen Aiestaran. Heriotzaren berria jakin bezala, herriko jaiak bertan behera utzi zituzten Villabonan.

Urtero bezala, uztailaren 31n omenaldia egingo diote bere izena daraman pasealekuan, 20:00etan. Dantzariak, bertsolariak eta musikariak izango dira.

Ez da azken egunotako eraso bakarra izan. Joan den astean, pintaketa egin zioten Periko Solabarria ezker abertzaleko kide historikoaren horma irudiari, Barakaldoko Errontegi zubian (Bizkaia). Uztailaren 18an gertatu zen erasoa, 1936ko Espainiako altxamendu faxistaren urteurrenean, eta "Viva España" (Gora Espainia) idatzi zuten Solabarriari eskainitako horma irudiaren gainean.