AEB-ak

EBk eta AEBek akordioa itxi dute muga zergen inguruan

Bi aldeek iragarri dute ez dietela zerga gehiago ezarriko inportazioei eta "berrikusi" egingo dituztela lehendik indarrean diren altzairuaren eta aluminioaren gainekoak. Hala, "garai berri bat" hasi dela iragarri dute.

Juncker eta Trump, Etxe Zuriaren atarian, agerraldia egin ostean. /
Juncker eta Trump, Etxe Zuriaren atarian, agerraldia egin ostean. / Jim Lo Scalzo/EFE

Arantxa Elizegi Egilegor -

2018ko uztailak 26

Ezustean heldu da albistea. AEBetako presidenteak eta Europako Batzordeko buruak eman dute gauerdi inguruan egindako agerraldian: "Akordioa lortu dugu". Hala, ez dute muga zerga gehiagorik ezarriko eta inportatutako altzairu eta aluminioaren gainekoak berrikusteko konpromisoa hartu dute bi aldeek.

Lau puntu nagusi ditu hitzarmenak: ibilgailuak ez diren inportatutako industria gaiei dagokienez, muga zergarik, bestelako mugarik eta subsidiorik gabeko testuingurua lortzea hitzartu dute; energia alorrean elkarlanean aritzea ere adostu dute, eta Bruselak iragarri du handitu egingo dituela AEBetatik egindako gas inportazioak; merkataritza errazteko, burokrazia murrizteko eta kostua gutxitzeko elkarrizkeak iragarri dituzte; eta ohartarazi dute "indarrak batuko" dituztela euren interesak babesteko.

Industria produktuen gaineko merkataritza ez ezik, bestelako salgaiena ere errazteko urratsak iragarri dituzte bi aldeek, besteak beste, botikena, zerbitzuena, gai kimikoena eta sojarena. Azken horrekin lotuta Bruselak iragarri du epe motzean AEBei soja erosten hasiko dela. Izan ere, Txinako Gobernuak soja inportazioei ezarritako %25eko muga zergak kalte egingo die AEBetako ekoizleei. Ondorioz, EBrekin lortutako hitzarmenak eta Trumpek berak iragarritako diru laguntzak baretuko ditu haien beldurrak. 

Pozik agertu dira bi aldeak hitzarmenarekin. "Egun handia da gaurkoa. Presidenteak Etxe Zurira gonbidatu ninduenean akordioa lortzea zen nire helburua, eta hori da egin duguna", goratu du Jean-Claude Junckerrek. Hala, akordioarekin "bi aldeek irabaziko" dutela nabarmendu du Washingtonek: "Garai berri bat hasi da".

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna