Euskal presoak

Senideak zeramatzan autobusaren kontrako erasoaren "inpunitatea" salatu du Etxerat-ek

Urtzi Errazkinek eta Patrizia Velezek esan dute "onartezina" dela erasoa, "are gehiago kontuan hartuta autobus horrek ez zuela bide hori ezta antzekorik ere egin behar"

Etxerat elkatearen agerraldia. /
Etxerat elkatearen agerraldia. / June Prieto/Foku

Gotzon Hermosilla -

2018ko uztailak 30

Joan den larunbatean, Algeciras, Puerto eta Sevillako espetxeetara (Espainia) euskal presoen senide eta lagunak eramaten dituen autobusari eraso egin zioten. Autobusean zihoan lagun batek azaldu duenez, erasoa 19:00etan gertatu zen, Algecirasko bisitaldia amaitu eta autobusa Puerton eta Sevillan bisita izan zuten senideen bila zihoanean. Objektu gogor bat bota zieten, eta ezker aldeko kristaletako bat txiki-txiki eginda gelditu zen. Kristalaren ondoan bi senide zeuden eserita, baina kristala bikoitza denez, ez zuten zauririk jaso.

Etxerat-eko bozeramaile Urtzi Errazkin eta Patrizia Velezek salatu dute gertatutakoa, senideek pairatzen duten "babesgabetasuna" eta horrelako erasoek izaten dutem "inpunitatea". Esan dutenez, ez da lehenengo aldia, eta horrelako erasoak maiz gertatu dira senide eta lagunak espetxeetara eramatzen dituzten autobus eta furgoneten kontra.

Horrelako erasoak gertatzen direla jakinda, "salbuespeneko espetxe politikari" eta presoen urruntzeari eustea "onartzezina" dela uste dute Etxerat-ekoek. Horregatik, espetxe politika hori bertan behera uzteko, presoak Euskal Herriko espetxeetara hurbiltzeko eta gaixo handi diren presoak berehala askatzeko eskatu dute.

Espainiako Gobernua laster batean presoak hurbiltzen has daitekeela dioten zurrumurruen aurrean, Velezek esan du "adierazpenak" baino gehiago "ekintzak" behar dituztela. "Presoez hitz egiten dutela entzuten dugu, baina oraingoz ez dago aldaketarik, eta horrelakoek senideengan antsietatea besterik ez dute sortzen", azaldu du. Egin beharreko mugimenduak "lehenbailehen" egiteko eskatu du, auzia "presazkoa" delako.

Etxerat-ek gogorarazi du asteazkenean urteroko elkarretaratzea egingo dutela Loiolako basilikan (Gipuzkoa), eta asteburuan Euskal Herriko hondartzetara joko dutela euskal presoen eskubideak aldarrikatzera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna