Dantza

Euskal Herriko sei konpainiak hartuko dute parte munduko dantza garaikideko azoka nagusian

Internationale Tanzmesse azokaren 12. edizioan parte hartuko dute, Etxepare Euskal Institutuaren eta Euskal Herriko Dantza Profesionalen Elkartearen elkarlanari esker. Kukai dantza konpainiaren Oskara eta Jone San Martinen Atlas I / Any Body Sounds lanak jaialdiaren programan hautatu dituzte.

Kukai dantza konpainiak 2016an estreinatu zuen 'Oskara' ikuskizunak inauguratuko du jaialdia.
Kukai dantza konpainiak 2016an estreinatu zuen 'Oskara' ikuskizunak inauguratuko du jaialdia. Jon Urbe / Argazki Press

Andoni Imaz -

2018ko abuztuak 2

Bi urtean behin egiten da Internationale Tanzmesse azoka, Alemaniako Dusseldorf hirian. Aurten, abuztuaren 29tik irailaren 1era egingo dute, eta euskal dantzak presentzia bateratua izango du, Etxepare Euskal Institutuak eta Euskal Herriko Dantza Profesionalen Elkarteak gune bat izango dutelako bigarrenez, Basque Dance markapean. Bertan egongo dira Dantzaz konpainia, Igor and Moreno, Jone San Martin, Kukai dantza konpainia, La Glo Zirko eta Lokke / Olatz de Andres.

50 herrialdetik gorako 1.500 profesional elkartuko dira Tanzmessen, dantza garaikidearen alorreko profesionalen bilkura handienean: dantzariak, koreografoak, agentziak, banatzaileak... Laura Martin Euskal Herriko Dantza Profesionalen Elkarteko kideak azpimarratu du harremanak sortzeko eta indartzeko aukera eskaintzen duela azokak, "lanbide osoaren topaketa" baita. Haren ustez "barometro ona" da azoka, munduko beste tokietan zer egiten den ikusteko.

Azoka izateaz gain, jaialdia ere bada Tanzmessen, "erakusleihoa", Imanol Otaegi Etxepare Euskal Institutuko Euskal Kultura Sustatu eta Hedatzeko zuzendariaren hitzetan. Konpainiek eta sortzaileek euren lanak hiriko agertoki onenetan aurkezteko aukera dute, eta Euskal Herriko bi proiektu aukeratu ditu jaialdiak bere programazioan: Kukai dantza konpainiaren Oskara eta Jone San Martinen Atlas I / Any Body Sounds.

Jon Maia Kukai dantza konpainiako kidearen ustean, "ez da kasualitatea" Euskal Herriko hainbat proiektu egotea azokan, bertako sortzaileek "maila handiko lanak" egiten baitituzte urte osoan. Euskal artistak jaialdi askotan aritzen direla aldarrikatu du, era askotako proposamenekin. Kukai konpainiak, gainera, jaialdiaren inaugurazioan eskainiko du Oskara ikuskizuna. 2016ko urtarrilean estreinatu zuten, eta lasai doaz Dusseldorfera, jendaurrean makina bat aldiz egin dutelako dagoeneko. "Nazioarteratze prozesuan" harrapatu ditu jaialdiak, Maiak esan duenez, eta aukera baliatuko dute, datorren denboraldiari begira, haien lana erakutsi eta harremanak sendotzeko.

Bestalde, Jone San Martinek garapen prozesuan duen lan bat aurkeztuko du Tanzmessen: Atlas I / Any Body Sounds. Izan ere, San Martinek azaldu du jaialdiak baduela Open studios izeneko sail bat, eta oraindik burutu gabe dauden lanen 20 minutuko erakustaldiak egingo dira bertan. Abuztuaren 30ean arituko da jaialdian, baina obra ez da urriaren 6 edo 7ra arte estreinatuko. Gorputzaren eta soinuaren arteko harremanean sakondu nahi izan du lanean; "dantzariaren barne ahotsa" izango da protagonista. Emanuele Soavi dantzari eta koreografo italiarrarekin eta Mikel R. Nieto soinu artista donostiarrarekin batera ari da egiten proiektua.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna