Katalunia

Junquerasek eta Romevak salatu dute epaiketa bidegabea izango dutela

La Vanguardia egunkarira bidalitako gutun batean, salatu dute epaiketa politikoa izango dela. Herritarrei "gizalegezko jokabidea" izateko eskatu diete.

Oriol Junqueras eta Raul Romeva prentsaurreko batean./
Oriol Junqueras eta Raul Romeva prentsaurreko batean./

Ainhoa Larretxea Agirre -

2018ko abuztuak 6

Aurtengo udazkenean epaituko dituzte Kataluniako prozesu subiranistari buruzko auzian auzipetutako buruzagi independentistak. Epaituko dituztenen artean daude Oriol Junqueras, Generalitateko presidenteorde ohia, eta Raul Romeva, Atzerri Gaietarako kontseilari ohia; biak ere Espainiako Gobernuak kargutik kenduak. Epaiketa bidegabea izango dutela salatu dute La Vanguardia-ra bidalitako iritzi artikuluan. Matxinadaz, sedizioaz eta dirua bidegabe erabiltzeaz daude akusatua, eta egun Lledoners-ko (Bartzelona, Katalunia) espetxean daude preso,

Udazkenean epaiketa "politikoa" izango dutela salatu dute Junquerasek eta Romevasek: "Egin ez ditugun delitu batzuez akusatuta gaude, erabili ez dugun biolentzia oinarrituta. Epaiketa politikoa izango da, demokraziarentzako lotsagarria, eskubideak eta askatasunak atzera egiten ari diren honetan".  

Ohartarazi dute ezen epaiketan, beraiek ez ezik, boza eman zuten milioika herritar epaituko dituztela: "Ez gaituzte gu epaituko. Bozkatu nahi zuten milioika kataluniar epaituko dituzte. Zaila jarriko diegu: ilusioz eta arrazoinamenduz beteta aurkituko gaituzte, bizikidetza eta justizia sozialaren aldeko mezuekin".

Gertatzen dena gertatzen dela, herritarrei "gizalegezko jokabidea" izateko eta gorroto mezurik ez zabaltzeko eskatu diete kontseilari kargugabetuek espetxetik bidalitako gutunean. Ez dutela etsiko adieraziz bukatu dute eskutitza: "Askatasunaren prezioa espetxealdi luzea bada, onartuko dugu. Gure espetxaldiko egun bakoitzak lotsagarria izan behar luke bere burua ereduzko demokraziatzat jotzen duen estatu batentzat".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna