Iruñeko gaztetxea

Maravillas gaztetxea "erabateko enfrentamendua" bilatzen ari dela salatu du Solanak

Nafarroako Gobernuko bozeramailearen esanetan, gaztetxeko ordezkarien jarrerak "ez du elkar ulertzeko tarte handirik uzten". Eztabaidak "beste tonu bat" eskatzen duela adierazi du, eta elkarrizketarako borondatea azaldu.

Maria Solana Nafarroako Gobernuko bozeramailea, artxiboko irudi batean. /
Maria Solana Nafarroako Gobernuko bozeramailea, artxiboko irudi batean. / EFE

Berria -

2018ko abuztuak 8

Maravillas gaztetxeko kideek eraikin okupatua ez husteko eskatu zioten atzo Geroa Bairi. Horrez gain, gaztetxeko bost kide ikertuei akusazioa kentzea galdegin zuten. Maria Solana Nafarroako Gobernuko bozeramaileak erantzun die gaur gaztetxeko ordezkariei, Ser irratian egin dioten elkarrizketan. Haren esanetan, eraikin okupatuaren gaineko eztabaidak "beste tonu bat" behar du, eta gaztetxeko kideei leporatu die "erabateko enfrentamendu" jarrera izatea gobernuarekin. "Badirudi ez dela tarte handirik utzi ustez lortu nahi den elkar ulertzerako". Dena den, hitz egiteko prestasuna berretsi du, eta ziurtatu du gobernua harremanetan egon dela gaztetxearekin.

Solanak gaineratu du "beste gauza batzuk egiteko espazioa nahi duten" elkarte eta gazte talde gehiagoren iritziak ere entzun nahiko lituzkeela. "Ezin da helburu batekin aurrera egin beste batzuen beharrak arriskuan jarriz".

Gobernuko bozeramailearen esanetan, Maravillas gaztetxeko kideen kritikak "ez datoz bat errealitatearekin". Gogorarazi duenez, Konpainia kalean zegoen gaztetxearen hustea kudeatu zuen gobernuak, eta nabarmendu du "bitartekaritza, negoziazioa eta irtenbide arrazoitu eta arrazoizkoa" izan zela orduan.

Ildo horretan, Solanak aurreratu du egungo gaztetxea hustu egingo dela ziurrenik, "baina ez aurrez pentsatzen den giroan". "Hala ez izatea espero dut", adierazi du. "Zer urrats egin aztertuz joango gara, eta erarik onenean ematen saiatuko gara, interes orokorra defendatuz, eta inorentzako desiragarriak ez diren ondorioak saihestuz".

Gaztetxeko kideak espazio publiko bat legez kanpo okupatzen ari direla ziurtatu du gobernuko bozeramaileak. "Nafarroako Gobernuak ez dio muzin egingo legea betetzeari, Iruñeko Udalak gune horren erabilera neurri batean ordenatzeko beharrezko neurriak hartu dituen bezala".

 

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna