Kirola

Erremonte txapelketa


Erremonteko Buruz Burukoa

Endika sartu da Kutxabank Torneoko ligaxkan

23-30 irabazi dio Ezkurra II.ari, eta joan den urteko arantza atera du. Orain Uterga, Barrenetxea IV.a eta Urriza izango ditu aurkari.

Endikak ligaxkara salto egin du aurten
Endikak ligaxkara salto egin du aurten Maialen Andres

Iñigo Goñi Iradi -

2018ko abuztuak 10

Endika Urrutia sailkatu da Kutxabank Torneoko ligaxkarako, Josetxo Ezkurrari nagusituta. Saldiasko atzelariak 23-30 irabazi zuen, sakeak garrantzi berezia izan zuen norgehiagoka batean. Hala, Endikak iazko arantza atera du: orduan, Ezkurra II.ak kanporatu zuen, 30-29 irabazita.

Partidak bi fase izan zituen. Lehendabizikoa oso berdindua izan zen, eta Ezkurra II.ak alde txikiak atera zizkion, tanto bakarra gehienetan. Biak ongi ari ziren, piloteo bikainekin; Ezkurrak sakearekin min handiagoa egiten zuen, eta Endikak, berriz, ez. 15-14koa egin eta gero, partida goitik behera aldatu zen. Endika sakearekin asmatzen hasi zen. Ordu arte, Ezkurrak sei tanto egin zituen sakearekin, eta ez zuen beste bat ere egin amaiera arte. Endikak, berriz, bi zeramatzan, eta amaieran hamabi egin zituen. 

15-14kotik 16-23kora pasatu ziren, 1-9ko partzial batekin. Ezkurrak hiru tantora hurbiltzea lortu zuen, eta Endikaren bikia arazoak ematen hasi zen, baina aldeari eustea lortu zuen. Sakea berreskuratu, eta 20-28ra aldentzea lortu zuen berriz ere. Joan den urtean 26-29 irabazten joan eta gero, 30-29 galdu zuen, baina azkenean ez zen iazkoa errepikatu, eta partida bukatzea lortu zuen, 23-30. Endikak 14 tanto egin zituen piloteoan, eta 12 sakez; guztira lau pilota galdu zituen. Ezkurra II.ak 13 tanto egin zituen, eta sei sakez. Galdutakoak ere lau zituen, bi sakez eta bi piloteoan. 

Orain, Endikak Barrenetxearen aurka jokatuko du, asteartean. Urrizak eta Utergak irekiko dute ligaxka, bihar. 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna