Tafallako enpresa bateko 52 urteko B.E.A errioxakoa (Espainia) zen, eta obra batean lanean ari zela oso goitik erori da. Iruñeko Erripagaina auzoan izan da ezbehar hilgarria; langilea istripua gertatu eta ber-bertan hil da, eta hara joandako anbulantziak ezin izan du ezer egin.
Foruzaingoak 14:00 inguruan jaso du abisua, eta behaketak egiten eta lekukotasunak jasotzen ari da orain. Auzi medikuak istripua izan den lekuan daude, ikerketak egiten.
Euskal Herrian lau egunean lan istripuz hil den hirugarren langilea da gaurkoa. Igande gauean, arrantzale bat hil zen Hondarribian (Gipuzkoa), arrantza deskargatzen ari zela. Larunbatean, berriz, beste langile bat hil zen Vianako (Nafarroa) Papelera del Ebro enpresan. Paper fabrikako teilatuan zegoela, hura puskatu, eta langilea erori egin zen.
