Lan gatazka

Bertan behera geratu da Gipuzkoako sorosleen greba

Langileak subrogatzea eta haien lan baldintzak hobetzea hitzartu dute Gurutze Gorriarekin eta kostaldeko udalekin.

Bertan behera geratu da sorosleek gaur hastekoa zuten greba. /
Bertan behera geratu da sorosleek gaur hastekoa zuten greba. / Idoia Zabaleta/Foku

Arantxa Elizegi Egilegor -

2018ko abuztuak 15

Langileek berretsi egin dute ELA sindikatuak Gurutze Gorriarekin eta Gipuzkoako kostaldeko udalekin adostutako hitzarmena. Hala, bertan behera utzi dituzte gaur hasi eta uda amaiera arte egitekoa zuten greba.

Adostutakoaren arabera, subrogatu egingo dituzte proba fisikoak gainditzen dituzten langileak, eta lanean daramaten denboraren araberako antzinatasun plusa kobratuko dute laugarren urtetik aurrera. Udalek, berriz, konpromisoa hartu dute adostutako puntu guztiak lan hitzarmenean jasotzeko.

Horretaz gainera, sorosle lanetan aritzen diren lehen urtean hilero 200 euro igoko zaie soldata, eta 400 euro bigarren urtean. Izan ere, hori zen langileen eskaeretako bat, alegia, soldatak igerilekuetako sorosleenekin parekatzea —1.000 euro inguru kobratzen dute hondartzetako sorosleek, eta 1.500 eta 1.600 euro artean, berriz, igerilekuetakoek—.

ELA sindikatuak ontzat eman du akordioa, baina gaitzetsi egin ditu aurreko hilabetean egindako lanuzteetan Jaurlaritzak ezarritako gutxiengo zerbitzuak, %80koak. "Eusko Jaurlaritzak greba eskubidea urratzea izan du helburu aisia, oporrak eta turismoa oinarrizko eskubide baten gainetik jarriz".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna