Analisia

Maravillas eta Bardea

 

Martxelo Otamendi Egiguren -

2018ko abuztuak 18

Maravillas gaztetxea hustuta nafar guztiena den ondasun bat berreskuratu dela esan du gobernuko eledun Solanak. Oposizioko alderdiek horixe bera esango zuketen hustearen ardura beren agindupeko Poliziak egin balu. Aldaketa ez da jardun eta azalpen guztietara iritsi, nonbait.

Nafarrenak izan eta nafar erakundeen esku ez dauden ondasunen zerrenda egiten hasita, zein lekutan egongo litzateke Maravillas gaztetxea hartzen duen jauregia, zerrenda hori merkatu prezioaren arabera egingo bagenu? Oso atzean, oso behean, zerrenda osatuko luketen ondasun lapurtuak edota okupatuak kontuan edukita. Ez da zaila asmatzea zein ondasunek hartuko lukeen lehen postua: Bardeak. 

Demagogia ariketa litzateke Nafarroako Gobernuari eskatzea foruzainak bidaltzea Bardeara eta Espainiako armada handik kanporatzearekin batera praktika militarreko eremua erabat ixtea. Baina horretaraino iritsi gabe, logikoa al da nafarren ondasun interesak horren sutsuki defenditzen dituen Nafarroako Gobernuak arreta handiagoa jartzea Maravillas gaztetxeari Bardeako okupazioari eta txikizioari baino? Zergatik? Maravillaseko gazteak baketsuak eta indargabeak direlako eta Espainiako armada indartsua delako?

Prentsaurreko eta adierazpen publiko gehiago egiten ditu Nafarroako Gobernuak Maravillasi buruz Bardeari buruz baino. Maravillas huts zezaten salaketa auzitegian jarri duen gobernuak zergatik ez du auzitegi berean jartzen Bardea husteko salaketa? Babesa izango du, baita egunotan borra kolpeak jaso dituzten gazteena ere; ez, aitzitik, gobernuaren jarrera txalotu duten alderdiena.

Okupazioa, benetako okupazioa, Bardean gertatzen da, eta hori Solanak badaki. Baina isilik dago.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna