Abuztu hasieran jaso zuen eskaera Euskotrenek; bertan, argi zioen Frantziako Poliziak atzeman eta Hendaiara eramaten zituzten migratzaileei trenerako txartela eman behar zietela langileek, eta Iruneraino eraman. LAB sindikatuak eman du prozeduraren berri, eta salatu egin du langileak halako ekintzetan parte hartzera behartzea eta migratzaileen aurka egitera bultzatzea.
Euskotrenek, berriz, onartu du badela halako prozedura bat, baina argudiatu du Europako araudiak direla medio derrigortuta daudela Frantziako Poliziarekin "elkarlanean" aritzera. Zehaztu du langileei ohar bat bidali zaiela egin beharreko urratsei buruzkoa, Frantziako Poliziak lehen aldiz migratzaileak Hendaiako geltokian utzi eta haiek zer egin ez zekitela geratu ostean: "Gertatzen ari dena berria da".
Bestalde, Gorlizko hondartzan (Bizkaia) berrehun lagun inguru bildu dira gaur, migratzaile eta errefuxietuen eskubideak aldarrikatzeko. Ongi Etorri Errefuxiatuak plataformak deituta egin dute Marea Horia; haren bidez, ikusarazi dute zer bide egin behar duten migratzaileek itsasoz eta lurrez, eta nola egiten duten talka azkenean Europako migrazio politikekin.
