Udalak azaldu duenez, neguko euriteek eta golf zelaietako drainatze sistema hondatuta egoteak eragin dute luizia. 30-40 metro luze eta bost metroko sakon den lur zatia 200 metro mugitu da, eta hainbat harri eta zuhaitz eraman ditu, eta aldamenetik igarotzen den erreka bat estali. Udalak iragarri du teknikariak gaur bertan joango direla luizia izan den gunera, egoera aztertzera.
2001. urte amaieran, Bizkaiko Aldundiarekin adostutako truke bat dela medio, Artxandako Golf Klubaren esku geratu ziren Ganguren mendi magaleko 538.000 metro koadro. 2002an hasi zituzten golf zelaia eraikitzeko lanak, zeinak Galdakao eta Larrabetzu arteko milioi bat metro koadro hartuko zituen.
Golf zelaia 2006an inauguratu zen, baina urte gutxiren buruan itxi zuten. Orain, han dagoen jatetxe bat ez beste guztia hiru banketxerena da. Udalak salatu du ingurua "erabat utzita" dagoela.
