eskumenak

Gizarte Segurantza eta espetxe eskumena eskualdatzeko lantaldea eskatu dio Erkorekak Sanchezi

Jaurlaritzako bozeramaileren ustez, martxan jarri behar da, "atzerapenik gabe", Gizarte Segurantzaren kudeaketa ekonomikoa egingo duen lantaldea.

Josu Erkoreka Eusko Jaurlaritzako bozeramailea, Gasteizen.
Josu Erkoreka Eusko Jaurlaritzako bozeramailea, Gasteizen. David Aguilar/ EFE

Iraitz Mateo Gogorza -

2018ko abuztuak 21

Josu Erkoreka Eusko Jaurlaritzako bozeramaileak Espainiako Gobernuari eskatu dio "atzerapenik gabe" lantalde bat sor dezala, Gizarte Segurantzaren kudeaketa ekonomikoa Euskal Autonomia Erkidegora eskualdatzeko. Esan du espetxe eskumena ez eskualdatzeko arrazoirik ez dagoela eta Eusko Jaurlaritzak ez duela onartuko transferentzia horiek egiteko "erresistentzia arbitrarioa" egotea. Gaineratu du "lehentasunezko" gaiak direla Iñigo Urkulluren taldearentzat.

Erkorekak adierazi du bi administrazioen artean hasi direla elkarrizketak eta PSOEren gobernuak badakiela "premiazko" gaiak zeintzuk diren: espetxe politikaren eta Gizarte Segurantzaren kudeaketa ekonomikoaren transferentzia. EAJren eta PSE-EEren arteko gobernu itunean horrela adostu zela esan du Erkorekak, eta Eusko Jaurlaritzak "mahai gainean" jarri dituela gaiak, baina ez duela erantzunik jaso: "Momentuz, ez dugu ez aldeko eta ez kontrako erantzun sendorik jaso".

Gizarte Segurantzaren alorrean "arazo teknikoak" egon daitezkela azaldu du Erkorekak, baina espetxe  transferentziarekin ezetz; batetik, Gernikako estatutuan jasota dagoelako eta, bestetik, Katalunian eskumen hori Generalitatearen esku  delako. Azaldu du, ETAren desegitearekin, "erresistentzia justifikatu zezakeen arrazoi politikoa" desagertu dela eta Gernikako estatutua bete behar dela. "Egun, alde juridikoa exijitu dezakegu, etorkizunera begira egin daitezkeen planteamenduak beste kontu batzuk dira, eskatzen duguna estatutua betetzeko da", adierazi du Erkorekak. Eta esan du aldaketa horiek "baikorrak" izango direla "Euskadiko elkarbizitza politikorako" ere.

Bestalde, urte politiko berria datorren asteartean hasiko du gobernu kontseiluak Donostiako Miramar jauregian egingo duen bilkuran. Eta irailaren 20an izango da politiko orokorreko saioa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna