AEB-ak

Trumpen kanpainan iruzur egin izana aitortu du haren abokatu ohiak

Estatuburuarekin harremanak izan zituzten bi emakumeri ordaindu zien Cohenek, ezer zabaldu ez zezaten.

Michael Cohen abokatu ohia, auzitegietatik irteten, New Yorken. /
Michael Cohen abokatu ohia, auzitegietatik irteten, New Yorken. / Jason Szenes/EFE

Arantxa Elizegi Egilegor -

2018ko abuztuak 22

Zerga eta finantza iruzurra ere onartu ditu, baina eskandalua eragin duena beste aitortza bat izan da. Cohenek onartu du bi emakumeri ordaindu ziela orduan presidentetzarako hautagai zen Donald Trumpekin izandako harremanen berri zabal ez zezaten. Hori egin zuenean estatuburuaren abokatua zen Michael Cohen.

Cohenen arabera, Trumpek esan zion "nahitaezkoa" zela bi emakumeen isiltasuna erostea. Orotara zortzi delitu aitortu ditu: bost zerga ihesarengatik, bat bankuei iruzur egiteagatik, beste bat enpresen legez kanpoko ekarpenengatik eta azkena bi emakumeen isiltasuna erosteagatik. Abokatu ohiak akordioa egin du fiskaltzarekin, eta, horri esker, 65 urteko kartzela zigorra izan zitekeena gehienez ere bost urtera mugatuko da.

Ordea, Cohen ez da izan erruduntzat jo duten Trumpen aholkulari bakarra. Iruzur egitea egotzi diote Paul Manaforti ere. Trumpen kanpaina zuzendaria izan zen Manafort, baina hari egozten zaizkion delituek ez dute zuzeneko loturarik estatuburuarentzako egiten zuen lanarekin.

AEBetako presidenteak, hala ere, ez die kazetarien galderei erantzun nahi izan, ez behintzat Cohenen aurkako salaketen ingurukoei. Manaforti buruz, berriz, esan du "atsekabetuta" dagoela hari gertatutakoarekin, baina ukatu egin du berekin zerikusia duela, eta bere aurkako "sorgin ehiza" gaitzetsi du.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna