Urrizak aise irabazi dio Endikari Kutxabank Torneoko ligaxkaren hirugarren jardunaldiko lehenengo partidan. Emaitza 30-12 izan da: emaitza horrekin, Urriza finalerdietarako sailkatu da, eta Endikak azken partidaren zain egon beharko du. Barrenetxeak irabazten badu, Endika kanpoan geratuko da, eta alderantziz: Barrenetxeak ez badu irabazten, Endika izango da sailkatua.
Lehenengo postua ere jokoan egongo da. Utergak 27 tanto eginez gero, bera litzateke zuzenean finalista, eta, tanto horietara iristen ez bada, Urriza izango da finalean. Urrizak hamar punturekin amaitu du ligaxka; Utergak zortzi ditu partidu baten faltan; Endikak bost punturekin amaitu du, eta Barrenetxeak hiru ditu, hori ere azken partiduaren faltan.
Urriza eta Endikaren artekoak ez du emoziorik izan. Hasieran bakarrik egon da berdintasuna, baina, 14-11 eta 16 eta 1eko partzialarekin, Urrizak erraz irabazi du. Saldiasko atzelariak hasieran bakarrik eutsi dio aurrelariari. Gero, errestoan ez du asmatu, eta Urrizak 11 tanto egin dizkio lehenengo pilotakadarekin. Gaur arte partida guztiak izan dira berdinduak, baina bosgarrenean abantailak handitu dira.
