Merkataritza

NAFTA berritzeko aurreakordioa adostu dute AEBek eta Mexikok

Kanadarekin elkarrizketak "laster" hasteko prest agertu da Donald Trump "zuzentasunez negoziatuko badute". Mexikok aste honetan bertan itxi nahi ditu hiru aldeko negoziazioak.

Donald Trump gaur Etxe Zuriko Gela Ovalean.
Donald Trump gaur Etxe Zuriko Gela Ovalean. SHAWN THEW / EFE

Irune Lasa -

2018ko abuztuak 27

AEBek eta Mexikok alde biko aurreakordioa iritsi dute NAFTA Ipar Amerikako Merkataritza Libreko Ituna berritzeko giltzarri diren zenbait gaietan. Donald Trump pozik agertu da akordioarekin, baina ez dio NAFTA deitu nahi eta Kanadari baldintzak jartzen hasi da prentsaren aurrean.

Lehenago, aldiz, Mexikoko jarduneko presidente Enrique Peña Nietok Kanadako presidentearekin hitz egin duela azaldu du, Mexikoren helburua hiru aldeko negoziazioa "aste honetan bertan amaitzea dela". Akordioaren berri emateko Etxe Zuriko Gela Obalean Trumpek egindako ekitaldian, telefonoz hitz egin dute Trumpek eta Peña Nietok, eta elkar zoriondu dute, itzultzaile bat tarteko zuen elkarrizketa nahasi batean.

AEBetako eta Mexikoko negoziatzaileek adostutakoaren arabera, autogintza konpainiek muga zergarik nahi ez badute hiru herrialdeen arteko auto salerosketan, auto horien balioaren %75 Ipar Amerikan manufakturatutakoa izan beharko da —orain arte muga %62,5ekoa zen—. Era berean, autoetarako bertako aluminio, altzairu eta osagai gehiago erabili beharko dituzte, eta auto guztien zati jakin bat orduko gutxienez hamasei dolar (hamahiru euro) irabazten duten langileek egin beharko dituzte. Horrek mesede egiten die AEBetako eta Kanadako lantegiei.

Orain, hirugarren aldea, Kanada, negoziazioetara itzuliko den ikusi behar da. Kanadari gonbita egiteko prest agertu da Donald Trump gaur, nahiz eta baldintzak jartzen hasi. AEBetako presidentea prest agertu da Kanadako presidente Justin Trudeauri "laster" deitzeko, bizilaguna "zuzentasunez negoziatuko badu". Hala ere, hainbat iturriren arabera, AEBetako eta Mexikoko negoziatzaileak ez dute Kanadaren parte hartzea zalantzan jartzen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna