Indarkeria matxista

Gizonezko bat atxilotu dute Getxon, bikotekideari erasotzea egotzita

Gasteizen beste gizon bat atzeman du Udaltzaingoak, bikotekidea jotzea leporatuta.

Indarkeria matxista salatzeko protesta bat, Bilbon
Indarkeria matxista salatzeko protesta bat, Bilbon Luis Jauregialtzo / Foku

Leire Artola Arin -

2018ko abuztuak 31

Indarkeria matxista delitu bat leporatuta atxilotu dute, Getxon (Bizkaia), 38 urteko gizonezko bat; epailearen esku geratuko da gaur. Getxoko Udalak ohar batean jakinarazi duenez, goizaldean dei bat jaso du Udaltzaingoak, ohartaraziz gizon bat bere bikotekide den emakumeari erasotzen ari zitzaiola. Urdulizko ospitalean artatu dute 30 urteko emakumezkoa, eta, alta eman ondoren, salaketa jarri du polizi etxean. Erasoa gaitzetsi du Keltse Eiguren Getxoko Berdintasun zinegotziak, esanez indarkeria sexista oro "giza eskubideen urraketa larria" dela.

Gasteizen ere beste eraso bat izan da gauerdian: 26 urteko gizon bat atzeman dute bikotekideari "masaileko gogor bat" ematea leporatuta. Lekuko batzuek abisatu diete udaltzainei, gizon batek andrazko bati eraso egin diola kalean. Bertaratu direnean, ordea, gizonezkoak zein emakumezkoak gezurtatu egin dute erasoa. Lekukoen testigantzei esker eta andreak aurpegian zituen markak ikusita, atxilotu egin dute gizonezkoa; halere, bikotekideak ez du salaketarik jarri nahi izan. Atxilotua epailearen aurrera eraman dute gaur goizean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna