URTE POLITIKOAREN HASIERA

Martinezek Ahal Dugu jo du EAJri aurre egiteko "alternatiba bakartzat"

Ahal Dugu-ko idazkari nagusiak EAJri eta EH Bilduri esan die ez dezatela "denbora galdu" Ahal Dugu aliantza "identitarioetara" erakartzen saiatzen.

Lander Martinez, gaurko ekitaldian hizketan.
Lander Martinez, gaurko ekitaldian hizketan. / @podemosEuskadi

Jon O. Urain -

2018ko irailak 1

Araba, Bizkai eta Gipuzkoako Ahal Dugu-k urte politikoa abiatzeko ekitaldia egin du gaur goizean Bilbon, Gazte Moreak alderdiko gazte antolakundea aurkezteko topaketa bat baliatuta. Ekitaldian, hitza hartu du Lander Martinez Ahal Dugu-ko idazkari nagusiak, eta nabarmendu du berak zuzendutako alderdia dela "herrialde honetan geratzen den ezkerreko oposizio bakarra, EAJren aurrean alternatiba izan nahi duen bakarra".

Euskal Autonomia Erkidegorako adosten ari diren estatus politiko berriaz mintzatu ziren atzo EAJ eta EH Bildu urte politikoa hasteko ekitaldietan, eta gai bera izan du hizpide Martinezek ere. Uste du bi talde politikoek estatus berriaren oinarrietan adostutako testua "oso identitarista eta baztertzailea" dela, eta EH Bilduri egotzi dio "soilik auzi nazionalean oinarritutako aliantza bat" eskaini izana EAJri, "gai sozialak, lan arlokoak, ingurumenekoa, feministak eta abar baztertuta".

Erantsi du ez dezatela "denbora galdu" Ahal Dugu akordio horretara erakartzen saiatzen: "Argi dugu ez garela jausiko beti auzi nazionalaren erlojuari begira dagoen baina auzi sozialean berandu iristen den untxi txuriari jarraitzeko akatsean", esan du, Arnaldo Otegi EH Bilduko koordinatzaileari erreferentzia eginez.

PSE ere kritikatu du: "Urduri dago, hautetsontzietan baino ez du pentsatzen, eta zeozer saltzeko behar larria dauka, egiazki hutsala bada ere". Gaineratu du PSE-EEren "garaia igaroa" dela eta EAJren "gehigarri" izatea besterik ez duela.

PP: "Itunak hondamendiaren ertzera darama Euskadi"

Araba, Bizkai eta Gipuzkoako PPk, berriz, Gasteizen ekin dio urte politikoari. Alfonso Alonso presidenteak EAJri eskatu dio "zuzendu" eta "atzera" egin dezala autogobernu lantaldean eginiko akordioan, iritzita EAJren eta EH Bilduren arteko itunak "Euskadi hondamendiaren ertzera" daramala. Horren ordez, jeltzaleei eskatu die "estatutuaren aldeko" indarrekin negozia dezala estatutuaren "legezko" erreforma bat.

Izan ere, Alonsok uste du estatus berriaren oinarriek "proiektu erradikal eta legez kanpoko bat" proposatzen dutela, Espainiako Konstituzioaren "kanpokoa", eta "Euskadin bizikidetza mehatxatzen" duela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna