Zinema

'Handia' ez da lehiatuko Oscarretan

Espainiako zine akademiak Campeones filma aukeratu du ingelesez besteko filmen atalean Espainia ordezkatzeko.

Berria -

2018ko irailak 6

Azken aukeraketan utzi dute lehiatik kanpo Aitor Arregi eta Jon Garaño zuzendarien Handia filma. Javier Freserren Campeones eta Asghar Farhadi zuzendariaren Todos lo saben filmak ziren beste bi hautagaiak, eta Campeones hautatu dute azkenean.

Espainiako Akademiak bi saltotan egiten du aukeraketa. Aurten, iazko urriaren 1etik aurtengo irailaren 30era estreinatu diren edo estreinatuko diren 43 lan aurkeztu zituzten. 43 horietatik hiru utzi zituzten azken aukeraketarako, eta gaur eman dute behin betiko hautagaiaren berri.

Emaitza jakin orduko, bidelagun izan dituztenei eskerrak eman dizkie Handia filmak, Twitter bidez.

Bestela ere sari ugari jasoa da Altzoko Handiaren bizitzan oinarritutako filma. Besteak beste, hamar Goya sari bereganatu zituen; tartean, aktore berririk onenarena Eneko Sagardoirentzat, jantzi diseinurik onenarena Saioa Lararentzat, eta muntaketarik onenarena Laurent Dufrech eta Raul Lopezentzat.

Ez da lehen aldia Jon Garañoren film bat Oscarretarako bidean izan dela: 2015eko irailean, Loreak lana aukeratu zuen Espainiako akademiak Oscarretarako ordezkari gisara. Ordea, azkenean lehiatik kanpo geratu zen Garañoren lan hura ere.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna