autogobernua

Alberto Lopez Basaguren proposatuko du PSEk adituen lantalderako

Gainerako alderdiek bihar jakinaraziko dute nor proposatuko duten estatutu proposamena idazteko.

Alberto Lopez Basaguren, Eusko Legebitzarreko Autogobernu Lantaldean, 214ko ekainaren 25ean.
Alberto Lopez Basaguren, Eusko Legebitzarreko Autogobernu Lantaldean, 214ko ekainaren 25ean. Raul Bogajo / FOKU

Jon O. Urain -

2018ko irailak 6

Eusko Legebiltzarreko talde politikoek bihar arteko epea dute aditu bana proposatzeko, bost adituz osatutako batzordeak testu artikulatuaren forma eman diezaien Autogobernu Lantaldean estatus berriaz onartutako oinarriei. EAJk, EH Bilduk, Elkarrekin Podemosek eta PPk bihar bertan jakinaraziko dute nor proposatuko duten horretarako.

PSE-EEk, ordea, gaur jakinarazi du Alberto Lopez Basaguren Konstituzio Zuzenbideko katedraduna proposatuko duela zeregin horretarako. Azken egunetan zabaldu da Lopez Basagurenen izena izan litekeela sozialistek proposatutako aditua, eta hala izango dela baieztatu du gaur bertan PSEk.

Lopez Basaguren (Basauri, Bizkaia, 1957) Politika Zientzietan lizentziaduna da, eta zuzenbidean doktorea. Euskal Herriko Unibertsitatean ematen ditu eskolak. Espainiako sistema politikoa eta federalismoa dira haren ikerketa lerroetako batzuk.

Erabakitzeko eskubidea estatus berriaren oinarrietan jaso dute EAJk eta EH Bilduk, baina horren kontra argi mintzatu da hainbatetan Lopez Basaguren; besteak beste, joan den igandean Vocento taldeak eginiko elkarrizketa batean. Bertan esan zuen erabakitzeko eskubidea "arazo konplexu bati emandako irtenbide sinplista" dela. 2014an eta 2017an Autogobernu Lantaldean aritu zen hizlari, PSE-EEk proposatuta, taldeek eskatutako agerraldien sortan.

PSE-EEk espero du adituen taldeak egingo duen lanak ahalbidetuko duela "pertsonen eskubideak zabaltzea, eskumenak errealitate sozialera egokitzea eta botere publikoen arteko harremanak berrantolatzea, eraginkortasuna irabazteko". Sozialisten arabera, ondoren legebiltzarrak hartuko du "proposamen bideragarri, erabilgarri, adostasun zabalagoko eta egungo ordenamendu juridikoa errespetatuko duen estatutu bat" lantzeko ardura.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna